عەزیز ئەحمەد: ئامانجی پڕۆژەی هەژماری من سەرپشککردنی هاووڵاتیانە لە هەڵبژاردنی بانکەکان

ئاڤا نیوز 

 

جێگری بەڕێوەبەری ئۆفیسی سەرۆكی حكومەتی هەرێمی كوردستان ڕایگەیاند، لە بابەتی پڕۆژەی هەژماری من، حکومەت دەیەوێت زۆرترین بژاردە لە بانکە حکومی، ئیسلامی، نیودەوڵەتی و تایبەتەکان بخاتە بەردەستی هاووڵاتییان، تاوەکو سوودمەندبن لە پاکێجەکان.

 

بۆچی گرنگە: ئامانج لە دەستپێشخەریی هەژماری من، ڕێکخستنی شێوازی پێدانی مووچەی فەرمانبەرانی کەرتی گشتی و پەرەپێدانی ئاسایشی دارایی و دابینکردنی کۆمەڵێک خزمەتگوزاریی داراییە بۆ هاونشتمانیانی هەرێمی کوردستان.

 

لێدوانی فەرمی: عەزیز ئەحمەد، جێگری بەڕێوەبەر ئۆفیسی سەرۆكی حكومەتی هەرێمی كوردستان لە هەژماری تایبەتی خۆی لە ئێکس نووسیویەتی: ئامانجی سەرەکی حکومەتی هەرێمی کوردستان لە پرۆژەی "هەژماری من" ئەوەیە کە هاووڵاتییان سەرپشک بن لە هەڵبژاردنی ئەو بانکانەی کە دەیانەوێت مامەڵەی لەگەڵدا بکەن.

 

وێنە گەورەکە: بۆ ئەوەی هەرێمی کوردستان ببێتە ناوەندێک کە تیایدا مامەڵە بە پارەی کاش نەمێنێت، حکومەتی هەرێمی کوردستان دەستی بە بەدیجیتاڵکردنی پرۆسەی پێدانی مووچە لە ڕێگەی پڕۆژەی "هەژماری من" کردووە.