دەستێک دەیەوێت گەشەسەندنی ئابووریی هەرێمی کوردستان ڕابگرێت

ئاڤا نیوز 

 

ئاگرکەوتنەوە و سووتانی یەک لەدوای یەکی بازاڕەکانی شاری هەولێر گومانی لەلای خەڵک دروست کردووە کە ئەم ڕووداوانە بەبێ هۆکارنین و دەستێکی لەپشتەوەیە، سەرۆکی دەستەی وەبەرهێنان لەمبارەیەوە دەڵێت "نەیاران ئابووریی کوردستان دەکەنە ئامانج".

 

وێنە گەورەکە: ژێرخانی ئابووری و ئاسایشی هەرێمی کوردستان لە ساڵانی ڕابردوودا گەشەسەندنێکی باشی بەخۆیەوە بینیوە، بەڵام بە مووشەک و سووتاندنی بازاڕەکانی هەوڵ بۆ ڕاگرتنی گەشەسەندنی کوردستان دەدرێت. 

 

لێدوانی فەرمی: د.محەممەد شوکری، سەرۆکی دەستەی وەبەرهێنان بە ئاڤا نیوزی گوت: "لێدان لە کەرتی ئابووری، بەئامانجگرتنی پلان و ستراتیژیەتی سەرۆکوەزیران بارزانییە، کە هەوڵ دەدات ئابووریی کوردستان بخاتە سەر پێی خۆی و ئابوورییەکی سەربەخۆ و فرەچەشن و گەشەسەندوو دروست بکات، بۆیە هەموو کات لەلایەن نەیارانەوە کوردستان دەکرێتە ئامانج."

 

لەلایەکی دیکەوە: بارزان قەساب، بەڕێوەبەری ئاسایشی هەولێر بۆ ئاڤا نیوز گوتی "هەر کەس و لایەنێک چ لە ناوخۆ بێت یان لە دەرەوە بیەوێت ئابووری و گەشەسەندنی هەرێمی کوردستان بکاتە ئامانج، بەتووندترین شێوە ڕووبەڕووی دەبینەوە، ئەرکی ئێمە پاراستنی ئارامی و ئاسایشە".

 

ئەوەی لەبارەیەوە دەگوترێت: ڕووداوەکانی ئاگرکەوتنەوە و هێرشکردنە سەر ژێرخانی ئابووریی کوردستان دەستێکی لەپشتە و هەوڵ دەدات گەشەسەندنی ئابووریی کوردستان ڕابگرێت.