ڕووسیا و چین پاڵپشتیی عێراق دەکەن لە کۆتاییهێنانی ئەرکەکانی یۆنامی

ئاڤا نیوز 

لە دانیشتنێکی ئەنجوومەنی ئاسایشی نێودەوڵەتی هەر یەک لە وڵاتی ڕووسیا و چین پاڵپشتیی خۆیان بۆ داواکاریی عێراق ڕاگەیاند، لە کۆتاییپێهێنان بە ئەرکی یۆنامی.

وێنە گەورەکە: دوێنێ پێنجشەممە، ئەنجوومەنی ئاسایشی نێودەوڵەتی بۆ گفتوگۆکردن لەبارەی کۆتاییهێنان بە ئەرکەکانی نوێنەرایەتیی نەتەوە یەکگرتووەکان(یۆنامی) لە عێراق کۆبووەوە.

ڕاگەیێنراوی فەرمی: "عێراقییەکان ئامادەن بەرپرسیارەتیی داهاتووی سیاسیی خۆیان هەڵبگرن و ئەو کێشانەی هەن نابێت ببێتە بیانووی مانەوەی یۆنامی" ڤاسیلی نیبینزیا، نوێنەری هەمیشەیی ڕووسیا لە نەتەوە یەکگرتووەکان وای گوت.

گینگ شوانگ، نوێنەری چین لە نەتەوە یەکگرتووەکان گوتی:"دەبێت ئەنجوومەنی ئاساییش پلانێک پێشنیاز بکات بۆ کشانەوەی وردە وردە تا کۆتاییهاتنی تەواوەتیی یۆنامی لە عێراق".

گۆشەیەکی دیکە: لیندا گرینفێڵد، باڵیۆزی ئەمریکا لە نەتەوە یەکگرتووەکان گوتی: "یۆنامی کاری گرنگی لە عێراق ماوە جێبەجێی بکات".

ئەوەی پێویستە بیزانیت: هەفتەی ڕابردوو محەمەد شیاع سوودانی، سەرۆکوەزیرانی عێراق داوای لە سکرتێری گشتیی نەتەوە یەکگرتووەکان کرد تا کۆتایی ساڵی 2025 کۆتایی بە ئەرکەکانی یۆنامی بهێنن.