شاخەوان عەبدوڵا: یاسای هەڵوەشاندنەوەی بڕیارەکانی ئەنجوومەنی سەرکردایەتیی شۆڕش دەوڵەمەندتر دەکەین

ئاڤا نیوز

 

پەرلەمانی عێراق دەنگدانی لەبارەی هەڵوەشاندنەوەی بڕیارەکانی ئەنجوومەنی سەرکردایەتیی شۆڕش (بەعس)ـی دواخست، بە مەبەستی دەوڵەمەندکردنی یاسایەکە لە بەرژەوەندیی خاوەن زەوییەکان.

 

بۆچی گرنگە؟ بە هەڵوەشاندنەوەی تەواوی بڕیارەکانی ئەنجوومەنی سەرکردایەتیی شۆڕش، بە سەدان هەزار دۆنم زەویی کورد و تورکمان لە کەرکووک و ناوچەکانی دیکەی دەرەوەی ئیدارەی هەرێمی کوردستان کە پێشتر بە عەرەبە هاوردەکان دراوە، دەدرێنەوە بە خاوەنە ڕەسەنەکانیان.

 

لێدوانی فەرمی: شاخەوان عەبدوڵا، جێگری سەرۆکی پەرلەمانی عێراق بە ئاڤا نیوزی ڕاگەیاند: "لە دانیشتنی ئەمڕۆی پەرلەماندا، دەنگ لەسەر بڕگەی دووەم نەدرا کە پەیوەست بوو بە یاسای گەڕاندنەوەی خانووبەرە بۆ خاوەنەكانی كە بڕیاری ئەنجوومەنی سەرکردایەتیی شۆڕش بوو".

 

زانیاریی زیاتر: جێگری سەرۆکی پەرلەمان هۆکاری دواخستنی دەنگدان لەسەر ئەو بڕگەیە بۆ ئەوە گەڕاندەوە کە ئەوان هەندێک ناوچەی دیکەیان بۆ ناو پرۆژە یاسایەکە زیاد کردووە، کە لە سوودی سەرجەم پێکهاتەکانە و "کاری باشمان لەو بارەیەوە کردووە".

 

ئەمەش بزانە: بەهۆی بڕیارەکانی ئەنجوومەنی سەرکردایەتیی شۆڕش، کورد و تورکمان و بەشێک لە عەرەبی شیعەمەزهەب، زەوییەکانیان لێ وەرگیرایەوە و درا بە عەرەبی هاوردە.