کۆمیسیۆن ئەنجامی 100%ـی دەنگدان ڕادەگەیەنێت

ئاڤا نیوز

دوای بەڕێوەچوونی پرۆسەی هەڵبژاردنی گشتیی بۆ خولی شەشەمی پەرلەمانی عێراق، کۆمیسیۆنی باڵای سەربەخۆی هەڵبژاردنەکان لە کۆنگرەیەکی ڕۆژنامەوانیدا ئەنجامی کۆتایی و 100٪ی دەنگدان ڕادەگەیەنێت. 

چیرۆکی سەرەکی: ڕۆژی سێشەممە، 11-11-2025، هەڵبژاردنی گشتیی بۆ خولی شەشەمی پەرلەمانی عێراق بەڕێوەچوو، دواتر لە دوای 24 کاتژمێر کۆمیسیۆن ئەنجامی بەرایی دەنگدانەکەی لە کۆنگرەیەکی ڕۆژنامەوانیدا ڕاگەیاند، ئێستا دوای هەفتەیەک لە بەڕێوەچوونی ئەو پرۆسەیە کۆمیسیۆن ئەنجامی کۆتایی ڕادەگەیەنێت. 

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤای ڕاگەیاند: دوای نیوەڕۆی ڕۆژی دووشەممە، کۆمیسیۆنی باڵای سەربەخۆی هەڵبژاردنەکانی عێراق ئەنجامی کۆتایی هەردوو دەنگدانی گشتی و تایبەتیی هەڵبژاردنی خولی شەشەمی پەرلەمانی عێراق ڕادەگەیەنێت.

زانیاریی زیاتر: لە پرۆسەی هەڵبژاردنی خولی شەشەمی پەرلەمانی عێراق 102 سکاڵا تۆمارکراون، 43 سکاڵا لە دەنگدانی تایبەت و 59 سکاڵا لە دەنگدانی گشتی، بەڵام بەو پێیەی سکاڵاکان ڕەنگی سووری تێدانییە و ڕەنگی سەوز و زەردبوون، بۆیە هیچ کاریگەری لەسەر ئەنجامی کۆتایی هەڵبژاردن نابێت.

ئەمەش بزانە: ئاڤا ڕووماڵی ڕاگەیاندنی ئەنجامەکان دەکات و هەوراز گوڵپی، ئەستێرەی ئاڤا میدیا زانیاریی ورد لەبارەی کورسی لایەنەکان و کاندیدە دەرچووەکان بۆ بینەران دەخاتەڕوو.