لەبارەی چارەنووسی قوتابییانی پۆلی 12ـی سلێمانی بڕیاردرا

ئاڤا دیجیتاڵ

 

وەزارەتی پەروەردەی هەرێمی کوردستان بڕیاری دا لەو قوتابخانانەی سلێمانی کە دەوام نەکراوە، تاقیکردنەوەکانی پۆلی 12 بۆ ماوەی 45 ڕۆژ درێژبکرێتەوە، قوتابییان تاقیکردنەوەکان لەگەڵ خولی دووەم دەکەن و بە خولی یەکەم بۆیان هەژمار دەکرێت. 

 

بۆچی گرنگە: وەزارەتی پەروەردەی هەرێمی کوردستان چەند بڕیارێکی لەبارەی قوتابییانی پۆلی 12 داوە، کە ڕێگردەبێت لە فەوتانی خوێندنی قوتابییان. 

 

وێنە گەورەکە: لە بەشێک لە قوتابخانەکانی سلێمانی بەهۆی بایکۆتی مامۆستایانەوە تاوەکو ئێستا دەوام دەستی پێ نەکردووە، ڕۆژی پێنجشەممە 01-02-2024 وەزیری پەروەردەی هەرێمی کوردستان لەگەڵ نوێنەری قوتابییانی پۆلی 12 کۆبووەوە و بڕیاری لە چارەنووسی قوتابییانی ئەو قوتابخانانە دا کە دەستیان بە دەوام نەکردووە. 

 

لێدوانی فەرمی: کۆشینا کۆسرەت، نوێنەری قوتابییانی پۆلی 12 لە سلێمانی لە کۆنگرەیەکی ڕۆژنامەوانیدا ڕایگەیاند "لەگەڵ ئالان حەمەسەعید کۆبووینەوە و داوامان کرد مەنهەجی خوێندن کەم بکرێتەوە، کەوتنی وانەکانی دەرچوونی قوتابیی بۆ تاقیکردنەوەی وەزاری بکرێت بە 4 بابەت، درێژکردنەوەی ماوەی خوێندن و تاقکردنەوەکانی وەزاری درێژ بکرێنەوە، تەنیا داواکاریی کەمکردنەوەی مەنهەج ڕەتکرایەوە".

 

زانیاریی زیاتر: وەزارەتی پەروەردەی هەرێمی کوردستان بڕیاری دا لەو قوتابخانانەی سلێمانی کە دەوام نەکراوە، تاقیکردنەوەکانی پۆلی 12 بۆ ماوەی 45 ڕۆژ درێژ دەکرێتەوە.

 

بڕیارەکە چۆن جێبەجێ دەکرێت؟ قوتابییانی پۆلی 12ـی ئەو قوتابخانانەی لە سلێمانی دەستیان بە دەوام نەکردووە، تاقیکردنەوەکان لەگەڵ خولی دووەم دەکەن و بە خولی یەکەم بۆیان هەژمار دەکرێت، هەروەها خولی سێیەم بۆیان دەکرێتەوە و لەم خولەشدا قوتابییان سێ تاقیکردنەوە لە هەفتەیەکدا دەکەن.