پلەی چوار هەزار و 403 ئەفسەری پێشمەرگە بەرزدەکرێتەوە

ئاڤا دیجیتاڵ

لە چوارچێوەی بەدامەرزاوەییکردنی هێزی پێشمەرگەی کوردستان و یەکخستنەوەیان، پلەی 4 هەزار و 403 ئەفسەر لە وادەی ئاسایی و یاسایی خۆی بەرزدەکرێتەوە.

بۆچی گرنگە: پلەبەرزکردنەوەی ئەفسەرانی پێشمەرگە یەکێکە لە هەنگاوەکانی حکومەتی هەرێمی کوردستان بۆ یەکخستن و بەدامەزراوەییکردنی سەربازییانەی هێزی پێشمەرگەی کوردستان، دوای دەرچوونی بڕیارەکەش جیاوازی مووچەکەیان بۆ خەرج دەکرێت.

وێنە گەورەکە: دوای ڕەزامەندی نێچیرڤان بارزانی، سەرۆکی هەرێمی کوردستان، خشتەی پلەبەرزکردنەوەی نەورۆز و ئەیلوولی ساڵەکانی 2020، 2021، خشتەی نەورۆزی 2022 ی ئەفسەرانی سەر بە فەرماندەیی هێزەکانی (70 و 80)، خشتەی پلەبەرزکردنەوەی ئەیلولی 2022 و خشتەی نەورۆزی 2023ـی ئەفسەرانی سەر بە وەزارەتی پێشمەرگە گەڕایەوە و پلەی چوار هەزار و 403 ئەفسەر بەرزکرایەوە. 

لێدوانی فەرمی: شۆڕش ئیسماعیل، وەزیری پێشمەرگەی هەرێمی کوردستان لە راگەیێنراوێکدا ئاماژەی بەوە کردووە، لە ماوەی ڕابردوودا لەگەڵ تیمی باڵای وەزارەتی پێشمەرگە وەک تێمێکی یەکگرتوو، بە بەرنامەیەکی دروست و سەرکەوتووانە کاریان کردووە، لەسەر ڕێکخستنەوەی دۆسیەی پلەبەرزکردنەوەی ئەفسەران و گەڕانەوەی پلەکانیان لە وادەی ئاسایی و یاسایی خۆی.

ئەمە نۆیەمین خشتەی پلەبەرزکردنەوەی ئەفسەرانی هێزی پێشمەرگەی کوردستانە، هاوکات فەریق روکن عیسا عوزێر، سەرۆکی ئەرکانی وەزارەتی پێشمەرگە دەڵێت: "هەموو هەوڵێک دەدەین بۆ ئەوەی بەزووترین کات خشتەکانی پلەبەرزکردنەوەی تەواوی ئەفسەرانی هێزی پێشمەرگە رێچکەی یاسایی خۆی وەربگرێت".، دڵنیاییش دەدات کار بۆ تەواوکردنی سەرجەم خشتەکانی پلەبەرزکردنەوەی پێشمەرگە دەکرێت و بەپێی پێویست و لەکاتێکی گونجاودا، فەرمانی پلە بەرزکردنەوەیان بۆ دەردەچێت.

ئەوەی پێویستە بیزانیت: پلەبەرزکردنەوەی پێشمەرگە تاوەکو پلەی جێگری ئەفسەر، راستەوخۆ بە فەرمانی وەزیر ئەنجامدەدرێت؛ بەڵام پلەبەرزکردنەوەی ئەفسەران لە وەزارەتی پێشمەرگەوە رەوانەی ئەنجوومەنی وەزیران دەکرێت و دوای رەزامەندیی ئەنجوومەنی وەزیران، دەبێت سەرۆکی هەرێمی کوردستانی مەرسومی بۆ دەربکات، دواتر بۆ وەزارەتی پێشمەرگە رەوانەدەکرێتەوە و دەچێتە بواری جێبەجێکردنەوە.