شەڕێ تورکیا و پەکەکێ زێدەتری 200 گوند ل سنوورێ ئامێدیێ چولکرینە

ئاڤا دیجیتاڵ

ب ئەگەرێ شەڕێ تورکیا و پەکەکێ ژ سالا 1991ێ ڤە و هەتا نوکە، زێدەتری 200 گوند ل سنوورێ قەزا ئامێدیێ هاتینە چولکرن.

 

وێنەیێ مەزن: دەما 33 سالانە شەڕێ تورکیا و پەکەکێ ل دەڤەرێن سنووریێن هەرێما کوردستانێ و ب تایبەت قەزا ئامێدیێ بەردەوامە، ب وێ ئەگەرێ ژی ژبلی چولکرنا گوندان دەهان وەلاتیێن سڤیل ژیانا خۆ ژدەستدانیە و برینداربوونە.

 

داخویانیا فەرمی: وارشین سلێمان، قائیمقامێ قەزا ئامێدیێ بۆ ئاڤا میدیا ڕاگەهاند، ژبەر شەڕێ پەکەکێ و تورکیا کو ژ سالا 1991ـێ ڤە و تا نوکە بەردەوامە، 201 گوند ل سنوورێ ئامێدیێ هاتینە چولکرن، نوکە ژی شەڕ و ئالۆزییێن وان دژوارتر لێهاتینە و زێدەتر نێزیکی جهێن ئاکنجیبوونێ بووینە.

 

کارتێکرن و لێکەفت: ژبەرکو هاتن و چوون و لڤینێن پەکەکێ ل سنوورێ وان گوندان، تورکیا ب وێ هێجەتێ هێرشی سەر وان دەڤەران دکر، ڤێ چەندێ ژی ب تەمامی ژین و ژیارا وەلاتیان ئێخستبوو د مەترسیێ دا و نەچاربوون گوندێن خۆ ڤالا بکەن.

 

ئەوا نوکە ڕووددەت: نوکە شەڕێ تورکیا و پەکەکێ دەربازی قۆناغەکا دی بوویە و هەرکو دچیت زێدەتر نێزیکی سەنتەرێ باژێڕ و گوند و جهێن ژیانا وەلاتیان دبیت و مەترسییێن زێدەتر لسەر وەلاتیان دروست دکەن.

 
ئەوا پێدڤیە بزانی: ل دویڤ ئامارێن ڕێکخراوا CPT یا ئەمریکی، ژ سالا 2015ـێ ڤە ژبەر هێرشێن تورکیا زێدەتری 149 وەلاتیان ژیانا خۆ ژدەستداینە و 227 کەسێن دی ژی برینداربوونە.