بەهۆی تەقینەوەی تانكەرێكی غاز لە كینیا سێ كەس گیانیان لەدەستدا و 300 كەسی دیكەش بریندارن

ئاڤا دیجیتاڵ

 

لە شاری نایرۆبی پایتەختی كینیا تانكەرێكی غاز تەقییەوە، بەهۆیەوە سێ كەس گیانیان لەدەستدا و 300 كەسی دیكەش برینداربوون.

ئەوەی پێویستە بیزانیت: دوای لێكۆڵینەوە دەركەوتووە منداڵێك لەنێو ئەو سێ كەسەدایە كە بەهۆی تەقینەوەی تانكەرێكی غاز لە شوێنێكی پیشەسازی لە نایرۆبی گیانیان لەدەستداوە.

لێدوانی فەرمی: ئیسحاق مواورا، گوتەبێژی حكومەتی كینیا ڕایگەیاند "بارهەڵگرێك كە غازی هەڵگرتبوو لە شارۆچكەی ئیمباكاسی لە دەوورووبەری كاتژمێر 11:30 تەقیوەتەوە و بەهۆیەوە سێ كەس گیانیان لەدەستداوە و 222 كەسی دیكەش بریندار بوون".

"خانووبەرە و شوێنە بازرگانییەكان و ئۆتۆمبێلەكان لەو ناوچەیەدا زیانیان بەركەوتووە، هێشتا لێكۆڵینەوە لە هۆكاریی ڕووداوەكە دەكرێت".

لەلایەكی دیكەوە: وێسلی كیمێتۆ، بەڕێوەبەری پۆلیسی ئیمباكاسی ڕایگەیاند " تا ئێستا بەهۆی تەقینەوەكەوە سێ كەس گیانیان لەدەستداوە كە یەكێكیان منداڵە ، 300 كەسی دیكەش برینداربوون".

"ئاگرەكە لە چەندین خانوو و شووقەی ناوچەكەدا بڵاوبووەتەوە و هەوڵی كۆنتڕۆڵكردنی دەدرێت". بەڕێوەبەری پۆلیسی ئیمباكاسی وای گوتووە.

ئەوەی لەوبارەیەوە دەگوترێت: بەگوێرەی بەشێك لە میدیاكان زۆرێك لە بریندارەكان برینەكانیان هەستیارە و دۆخیان باش نییە، لانیكەم 25 منداڵیش لەنێو 222 بریندارەكاندان.