چێنەر & برادەران؛ ئەمشەو ئاڤا گەنجانی کوردستان لە ئیسکان کۆدەکاتەوە

ئاڤا نیوز

 

ئەمشەو شەقامی ئیسکانی هەولێر شەوێکی بێوێنەی وەرزشی بەڕێدەکات، هەوادارانی وەرزش بۆ بینینی یاریی کۆتایی خولی یانە پاڵەوانەکانی ئەوروپا  لە هەموو شارەکانی کوردستانەوە لەوێ کۆدەبنەوە و هاوشێوەی یاریگای وێمبڵی جۆش و خرۆش دەدەنە یارییەکە.

 

چیرۆکی سەرەکی: کاتژمێر 10:00ـی شەوی شەممە 01-06-2024 یاریی کۆتایی چامپیۆنزلیگ لەنێوان هەردوو یانەی ڕیال مەدرید و بڕووسیا دۆرتمۆند بەڕێوەدەچێت.

 

چی ڕوودەدات؟: بۆ یەکەمجار ئاڤا سپۆرت کەرنەڤاڵێکی جەماوەریی وەرزشی لە کەشێکی دۆستانەدا لە شەقامی ئیسکان بە ئامادەبوونی گەنجانی هەموو شار و شارۆچکەکانی کوردستان ڕێکخستووە، کە هەمووان لە سێ شاشەی گەورەوە سەیری یارییەکە دەکەن و چێنەر عەبدولقادر، ئەستێرەی دیاری وەرزشیی کوردستان و ئاڤا میدیا لە ستەیجی ئیسکانەوە شرۆڤەی یارییەکە دەکات. 

 

لێدوانی فەرمی: چێنەر عەبدولقادر، بەڕێوەبەری ئاڤا سپۆرت دەڵێت: "ئەمشەو شەوی خۆمانە و ئیسکان دەکەینە وێمبڵی، خۆم و برادەرانم لە ئیسکان کۆدەبینەوە و  بێگومان بزنە بەناوبانگەکەشم لەگەڵ خۆم دەهێنم". 

 

ئەوەی پێویستە بیزانیت: زیاتر لە هەزار گەنج لە پارێزگاکانی سلێمانی و دهۆک و شار و شارۆچکەکانی سەر بە ئیدارە سەربەخۆکان میوانی هەولێر و ئاڤا سپۆرت دەبن، کە ئەو گەنجانە زۆرینەیان یەکەمجارە پایتەختی هەرێمی کوردستان دەبینن.

 

ئەمەش بزانە: ڕێوشوێنی تووندی ئەمنی بۆ سەقامگیریی کەشی کەرنەڤاڵەکە گیراوەتەبەر و تیمەکانی ئاسایش، بەرگریی شارستانی، تیمە تەندروستییەکان و هاتووچۆ لە شەقامی ئیسکان لە ئەرکدا دەبن.