سوودانی بۆ چوارچێوەی هەماهەنگی: دەست لە کار دەکێشمەوە

ئاڤا دیجیتاڵ

 

سەرۆکوەزیرانی عێراق لە دوایین کۆبوونەوەی چوارچێوەی هەماهەنگی هەڕەشەی دەستلەکارکێشانەوەی کردووە، ئەوەش بەهۆی هێرشی میلیشیاکان بۆ سەر بنکە سەربازی و پێگە دیپلۆماسییەکانی هاوپەیمانان و کاردانەوەی هاوپەیمانان بەرامبەر هێرشەکان، چونکە لە هەردوو بارەکەدا حکومەتەکەی توانای نییە رێگە لە هێرشی گرووپی میلیشیاکان و بۆردوومانەکانی ئەمریکاش بگرێت.

 

زانیاریی تایبەت: سه‌رچاوه‌یه‌كی باڵا له‌ ئه‌نجوومه‌نی وه‌زیرانی عێراق به‌ ئاڤا میدیای ڕاگەیاند، لەدوایین کۆبوونەوەی چوارچێوەی هەماهەنگی، محه‌ممه‌د شیاع سوودانی، سەرۆکوەزیرانی عێراق داوای کردووە هێرشی گرووپە چەکدارەکان ڕابگیرێن، ئەگەر وانەکرێت هەڕەشەی دەستلەکارکێشانەوەی کردووە و گوتوویەتی "هێرشی گرووپەکان بۆ سەر هێزەکانی ئەمریکا و بۆردوومانی ئەمریکاش بۆ سەر بنکەی گرووپەکان لە خاکی عێراق تووشی ئیحراجیی کردووم و ناتوانین دانوستاندن بکەین".

 

ئه‌وه‌ی پێویسته‌ بیزانیت: سوودانی لە ماوەی رابردوودا گوشاری خستە سەر گرووپە چەکدارەکانی نزیک لە ئێران بۆ ڕاگرتنى هێرشەکانىان بۆ سەر بنکەکانى ئەمریکا، ئەو گرووپانە دڵنیاییان داوە کە چیدیکە هێرش ناکە سەر بنکە سەربازییەکان.

 

زانیاری زیاتر: میلیشیای لیواکانی حزبوڵڵا ڕۆژی سێشەممە 23-1-2024، لە ڕاگەیێنراوێکدا هەڵپەساردنی ئۆپەراسیۆنە سەربازی و ئەمنییەکانیان لەدژی هێزەکانی ئەمریکا راگەیاند.

 

له‌لایه‌كی دیكه‌وه‌: وه‌زارەتی دەرەوەی عێراق سەركەوتنی دانوستاندنەكانی نێوان هەردوو حكومەتی عێراق و ئەمریكای ڕاگه‌یاند، گفتوگۆکان لە مانگی ئابی 2023وە دەستیانپێكرد و بە پێویستیی دەستپێكردنی لیژنەی باڵای سەربازیی (HMC) كۆتاییهات، بەمەبەستی هەڵسەنگاندنی هەڕەشە و مەترسییەكانی داعش.