فوئاد حوسێن: عێراق شوێنی نمایشكردنی هێز نییە

ئاڤا دیجیتاڵ

 

وه‌زیری ده‌ره‌وه‌ی عێراق له‌گه‌ڵ باڵیۆزانی یه‌كێتیی ئه‌وروپا، كه‌نه‌دا، به‌ڕازیل و ئوسترالیا له‌باره‌ی هێرشه‌كانی ئه‌م دواییه‌ی ئه‌مریكا کۆبووەوە و، نیگەرانییەکانی لەبارەی دۆخی ئەمنیی عێراق پێڕاگەیاندن.

 

لێدوانی فەرمی: وەزارەتی دەرەوەی عێراق ڤیدیۆی کۆبوونەوەی فوئاد حوسێنی لەگەڵ باڵیۆزەکان بڵاوکردووەتەوە، تێیدا فوئاد حوسێن باسی ئەوە دەکات خاكی عێراق گۆڕه‌پانی یه‌كلاكردنه‌وه‌ی کێشەکان و، شوێنی ناردنی په‌یام و نمایشكردنی هێزی وڵاتان نییە. 

 

لە کۆبوونەوەکاندا فوئاد حوسێن دڵنیایی بە باڵیۆزی وڵاتان دەدات و دەڵێت: "حكومەتی عێراق به‌رپرسه‌ له‌ پاراستنی نێرده‌ دیپلۆماسییه‌كان و ڕاوێژكارانی بیانی، هەر زیانگەیاندنێکیش ده‌ستدرێژییه‌ بۆ سه‌ر سه‌روه‌ریی عێراق، دەبێت كۆتایی به‌ ململانێی وڵاتان لە ناوچه‌كه‌ بهێنرێت و شه‌ڕ ڕابگیرێت".

 

باکگراوند: ئۆپەراسیۆنی تۆڵەی ئەمریکا لە سەرەتای ئەم مانگەدا بۆ سەر پێگەی گرووپە چەکدارەکان لە عێراق و سووریا، کە سێیەم هێرشی فەرمی و راستەوخۆی ئەمریکا بوو بۆ سەر حەشدی شەعی و،  بووە هۆی کوژرانی 16 چەکدار و برینداربوونی زیاتر لە 25 ی دیکە، کاردانەوەی تووندی حکومەتی عێراقی لێکەوتەوە. کۆبوونەوەی وەزیری دەرەوە و باڵیۆزی ئەو وڵاتانەش بۆ گەیاندنی پەیامی نیگەرانی حکومەتی عێراق بووە لەو هێرشانە.