مووچەی مانگی پێنجی پێشمەرگە و هێزە ئەمنییەکان دابەش دەکرێت

ئاڤا نیوز

لیستی ناوی پێشمەرگە و کۆدی هێزە ئەمنییەکان بۆ مانگی پێنج ڕەوانەی بەغدا دەکرێت، چاوەڕوان دەکرێت تاوەکو پێنجشەممە بگات و دەست بە دابەشکردنی بکرێت.

 

وێنە گەورەکە: لە دوێنێوە دەست بە خەرجکردنی مووچەی مانگی چواری پێشمەرگە و هێزە ئەمنییەکان کراوە و ئەمڕۆ دەست بە دابەشکردنی کرا، هاوکات ئەمڕۆ لیستی مووچەی مانگی پێنجی فەرمانبەران ڕاگەیێنرا، بەڵام ناوی ئەوانی تێدا نەبوو.

لێدوانی فەرمی:  سەرچاوەیەک لە وەزارەتی دارایی و ئابووری هەرێمی کوردستان بە ئاڤا نیوزی گوت، لیستی ناوی هێزە سەربازییەکان و کۆدی هێزە ئەمنییەکان ئامادەکراوە، بڕیارە لە 24 کاتژمێری داهاتوودا ڕەوانەی وەزارەتی دارایی عێراق بکرێت.

زانیاریی تایبەت: چاوەڕوان دەکرێت تاوەکو ئەم پێنجشەممەیە لە بەغدا پارەکە خەرج بکرێت، لەگەڵ گەیشتنیشی دەستبەجێ دەست بە دابەشکردنی دەکرێت، واتە تاوەکو جەژن دوو مووچە وەردەگرن.

لەلایەکی دیکەوە: تا ئێستا حکومەتی فیدراڵی پارەی مانگی پێنجی خانەنشینانی سەربازی نەناردووە، بەپێی زانیارییەکانی ئاڤا نیوز لەمڕۆژانە پارەی ئەوانیش دەنێردرێت و پێش جەژن مووچەی ئەوانیش دابەش دەکرێت.