دۆستەکانی مام جەلال لە سلێمانی جێگایان نابێتەوە

مەلا بەختیار لەو بەرپرسانەیە کە نە چەکداری هەیە و نە تێوەگلاوە لە بزنسی گەورە، ئەمەش بەو مانایەی ئەو هەڕەشەیەکی گەورە نییە بۆسەر یەکێتی، بۆیە پرسیارەکە ئەوەیە بۆچی یەکێتی ئەوەی بەرامبەر کرد؟ بۆچی هێزی چەکدار دەباتە سەر دەزگاکەی و ماڵەکەی؟ بۆچی تاقە شوێنێک کە ماویەتی کە ئەویش دەزگای چاودێرە و جگە لە چالاکی ڕۆشنبیری شتێکی دیکە ناکات دادەخرێت؟  

 

دەزگای چاودێر هەمو شەممەیەک چالاکییەکی ڕۆشنبیری ڕێکدەخست و تیایدا ڕەنگ و دەنگە جیاوازەکانی شار گفتوگۆیان دەکرد. هەر ئەو ڕۆشنبیرانەی بەشداربوون لەو چالاکییانە دەنگیان هەڵبڕیایە ئێستا کاری وا نەدەکرا. 

 

یەکێتیی نیشتیمانی نەدەبوو ئەوە بکات کە بەرامبەر مەلا بەختیار کردی، پیاوێک هەموو تەمەنی خۆی بەو حیزبە بەخشی. لە ڕاستیدا ئەوەی بەرامبەر ئەو کرا هیچ تەفسیرێکی سیاسی نییە، چونکە مەلا بەختیار بەو هەموو باکگراوندە مێژوویی و سیاسییەوە خۆی بۆ چالاکی ڕۆشنبیری یەکلاکردبوویەوە و هیچ پلانێکیشی دژ بە یەکێتی نەبوو تەنانەت لیستیشی نەبوو، بۆیە ئەوەی کرا بە تەنیا بڕیارێکی تاکڕەوانەی کەسیی  هەرزەکارانەیە.

پرسیار ئەوەیە ئایا سەرکردایەتی یەکێتی ئاگاداری ئەم بڕیارە بوون؟ هەر بەڕاستی سەرکردایەتیی یەکێتی ئاگاداری بڕیار و هەنگاوەکانی حیزبەکەیانن، عیماد ئەحمەد ڕازییە لەوەی بە مەلا بەختیار دەکرێ؟ بە دیوێکی دیکەدا ئەوەی کرا جۆرێک بوو لە بێ مۆراڵی. 

ئاخر کەمترین وەفا بۆ خەبات و تەمەنی مەلا بەختیار ئەوەبێ تەنانەت دەزگایەکی ڕۆشنبیریش بە یەکێک لە دۆستەکانی مام جەلال و سەرکردەی سەرەکیی حیزبەکەت بە ڕەوا نەبینی ئیتر مۆراڵ لە کوێدایە؟ 

لەولاوە ئەمە هەڕەشەیەکی ئاشکرایە  بۆ سەر ڕەوشی ئازادی و بوونی سیاسیی کەسایەتییەکان لە سلێمانی  کە هەق وایە لەلایەن هەموو ڕۆشنبیرانی کوردستانەوە بێ جیاوازی بیر و ئایدیا ڕەتبکرێتەوە، هەروەها لایەنە سیاسییەکان و حکومەتیش بێ هەڵوێست نەبن بەرامبەر ئەم پەلامارە،  چونکە دواجار ئەمە پێشێلکردنێکی ئاشکرای ئازادی سیاسی و رۆشنبیری و  لێدانە لە دیموکراسی.

 

سەنتەری میترۆ جوانی وتووە کە دەڵێ مەلا بەختیار میشێل ڤیڤیۆرکای هێنایە سلێمانی بافل تاڵەبانیش ڕەیان کلدانی.

 

پایتەختی ڕۆشنبیری بەرەو کوێ دەڕوات؟

 

دۆستەکانی مام جەلال لە سلێمانی جێگایان نەبێتەوە ئەی دەبێ دۆخی ئەوانەی دیکە چی لێبێت.