سوپاس ئاڤا؛ جارێکی دیکە فەرهاد پیرباڵت پێ ناساندینەوە

 

ساڵانێکە میدیای کوردی بەشێوەیەکی نەزانانە خەریکی ناشیرینکردنی د. فەرهاد پیرباڵە، فەرهادێک کە تەواوی تەمەنی خۆی بۆ لێکۆڵینەوە و گەڕان بەدوای مێژوو و ئەدەب و هونەری گەلەکەی تەرخان کردووە و دڵسۆزانە و ماندوونەناسانە، سەرقاڵی هۆشیارکردنەوەی کۆمەڵگە و تاکی کوردە، کەچی میدیا بێ مۆڕاڵ و بێ ستراتیژییەکان دەهاتن و ماندوویی و تووڕەییەکانی فەرهادیان دەقۆستەوە بۆ زیادکردنی ژمارەی لایک و بینەری خۆیان.!

 
لە ڕابردوودا بەشێک لە میدیاکانی کوردستان، لەجیاتی ئەوەی هاوکاریی فەرهاد پیرباڵ بکەن بۆ تێپەڕاندنی ئەو دۆخە سەخت و تاقەتپڕوکێنەی کە ساڵانێکە گیرۆدەی بووە، کەچی دەهاتن ئەو بیرمەند و پیاوە جوانەیان وەک شێت و نەزانێک پێ دەناساندین، بەڵام سوپاس بۆ ئاڤا، کە دوای بڕیاری خانەنشینبوونی فەرهاد پیرباڵ، لە پڕۆگرامێکی شایستە و پیشەییانەدا، جارێکی دیکە پیرباڵی ڕاستەقینەی پێ ناساندینەوە.
 
پیرباڵ لەو پڕۆگرامەدا زۆر بەوردی و ژیریی، بە ئاستبەرزیی زانستی و بیرکردنەوەی خۆی، وەڵامی پرسیارەکانی پێشکەشکارەکەی دەدایەوە بە دەربڕینێکی زۆر جوان و پڕچێژ، وەڵامی پرسیارەکانی پەیوەست بە ژیان و بەرهەم و بۆچوونەکانی خۆی دەخستەڕوو. 

 
زۆرجار بەندە، ڕەخنەم لە بێسەروبەریی میدیاکانی کوردستان گرتووە، بۆیە لێرە بە پێویستی دەزانم لەپای هەر کارێکی باش و پیشەییانە سوپاس و ستایش دەرببڕم، لەپێناوی کاری باشتر و ئاڕاستەی دروستی پیشەیی میدیایی. 

 
دووبارە سوپاس بۆ ئاڤا، ئافەرینێکیش بۆ شانۆ بەکر فەرەج، کە پێشکەشکاری بەرنامەکە بوو، دوور لە پرسیاری دووبارە و بێزارکەر و یاریکردن بە هەست و سۆز، بە پرسیاری باش و لۆژیکی و بەشێوەیەکی ئەخلاقی و پیشەییانە، توانیبووی کەشێکی لەبار و گونجاو بۆ میوانەکەی دروست بکات، کە پیرباڵی ئازیز بتوانێت تێیدا وەڵام و بۆچوونەکانی خۆی بە شێوازی تایبەتی خۆی و بە پوخت و دروست و ڕەوان بخاتەڕوو.