هەنسکێ لە مەرگی 'کاکە وریا' دا

لە ڕۆژگارێکی پڕ لە ڕووداو و گۆڕانکاریدا، (وریا)ـی وریا، لە تەنیا پەیامنێرێک زیاتر بوو؛ ویژدانێکی زیندوو بوو بۆ گەیاندنی ڕاستی بەبێ ڕتووش و ساختەکاری. چاونەترس و  بەجورئەت، مرۆڤدۆست و ژیاندۆست، تا ئەوەندەی بۆی بکرابا لەپێناو گەیاندنی دەنگی ستەملێکراوان و ناڵەی بێ نەوایاندا، ڕاستەڕێی میدیاکارێکی پیشەیی بەرنەدەدا.

(وریا) دواکۆچیشی کۆچێکی ئاسایی نەبوو، کۆچێک بوو لە گەرمەی سەرقاڵییدا بە هاریکاری و کارێکی مرۆییەوە، کۆچێک کە دەستی تاوانی خەمساردی و لە یاسادەرچوون و بێ مۆراڵی لەپشتەوە بوو.  وریا وەک ئەوەی لە ژیانیدا شانی دابووە بەر خەمی خەڵک، لە مەرگیشدا هەر ڕێگە و شێوازە سەختەکە بەشی بوو، تەنانەت بە مەرگیشی وانەیەکی پڕ لە ڕەخنە و داد و بێ دادیی وەک میراتی بۆ هاوپیشەکانی خۆی جێهێشت. 

مەرگی تراژیدیی (وریا) بەڵگەیە کە هەوڵی شاردنەوەی ڕاستییە تاڵەکان و پەردەپۆشکردنی گوناهکارییەکان هێشتا لە ئارادان و ساتەوەختی مەرگی کاکە وریاش هەنگاوێکی مەزنە لە کاروانی خەباتی پیشەیی میدیاکارانی کوردستاندا، هەنگاوێکە بەرەو ئامانج لەو شوێنەوە کە خەڵکانی دیکە پاشەکشەیان تیایدا کردووە.

کاکە وریای ڕەوانشاد، دەنگی زولاڵی بێدەنگکراوان و ڕەنگی درەوشاوەی ڕەنگلێبڕاوان بوو، یەکێک بوو لە پارێزەرانی ڕاستی لە سەردەمێکدا کە ڕاستی هەتیوو و بێ دایک و باوکە و گەمارۆدراوە.

گەرچی وریاکان دەزانن پیشەکەیان مەترسیدارە، کەچی بەدەگمەن دەبینی پاشەکشە بکەن. دەزانن قەڵەم و کامێرا لە هەڕەشە و چاوسوورکردنەوە و لێدان بەهێزترن. وریاکان چیرۆکی ڕۆژانەی ئەم گەلە تۆمار و نەمر دەکەن. ئەمڕۆش بەم کۆچە تراژیدییە ناڕەوایەی کاکە وریا، لاپەڕەیەکی گەشی نەمریی بۆ خۆی و هاوپیشە و ڕۆڵەکانی ئەم گەلە تۆمار کرد.

ماڵئاوا (وریای وریا) چاونەترسی و بوێری تۆ، قسە و رۆحسووکی و سادەیی و ڕەوشتی بەرزت، چرایەکی نەکوژاوەیە و تا ململانێی نێوان هەق ناهەق بمێنێت، بەدرەوشاوەیی دەمێنێتەوە.  

وێنە و ڤیدیۆ و ڕاپۆرت و پەیامەکانت، شایەتحاڵی ئەو ڕاستییەن کە  ڕۆژنامەگەری تەنها پیشەیەکی ئاسایی نییە، بەڵکو پیشەیەکی پڕ سەرئێشە و مەینەتیشە... پیشەی گەیاندنی پەیامێکە بە قوربانیدان و خوێن نووسراوەتەوە. تۆش کاکە وریا ناوت لە ویژدانی هەموواندا بە نەمری دەمێنێتەوە.