بەپارێزگابوونی هەڵەبجە سەرەتای بنیاتنانی کۆمەڵگەیەکی نموونەیی

بڕیاری دانپێدانان و بەڕەسمی ناساندنی پارێزگای هەڵەبجە لەلایەن ئەنجوومەنی نوێنەرانی عێراقەوە، دەستکەوتێکی گرنگی تەشریعی و سیاسیی و کارگێڕییە بۆ هەرێمی کوردستان بەگشتیی و هەڵەبجە بەتایبەتی. 

وێڕای پشتیوانی و دەستبارگرتنی لایەنە سیاسییەکانی هەرێمی کوردستان و پشتیوانی جەماوەری خەڵکی کوردستان لەو پرسە، پێویستمان بە پشتیوانی و دەنگی لایەن و فراکسیۆنە عەرەبییەکان لە سوننە و شیعە هەبوو، بۆ ئەوەی بڕیارەکە دەربچێت.

خاڵی هەرە گرنگ، یەکخستنی توانا و هەوڵەکانمانە بۆ چەسپاندنی بڕیارەکە و ڕێگری لە هەر ئەگەرێکی نەخوازراو، بۆ ئەمەش پێویستمان بە پێکەوە کارکردن و پاراستنی تەبایی و یەکڕیزی ناوخۆیی و پەرەپێدانی پەیوەندیی دۆستانەمانە لەگەڵ پێکهاتەکانی عێراقدا.

ئەو پەیوەندی و تەباییە بەوە دێتە دی، بەپارێزگابوونی هەڵەبجە وەک کارتێکی سیاسیی بۆ دژایەتی هیچ کەس و لایەنێک بەکارنەهێنرێت و نەکرێتە کەرەستەی موزایەدەی سیاسی و شکاندنی بەرامبەرەکان.

ئێمە وەک خەڵکی هەڵەبجە، سوپاسی هەموو ئەو کەسایەتی و لایەن و پێکهاتە و دەنگە بەڕێزانە دەکەین، کە لە پڕۆسەی بەپارێزگابوونی هەڵەبجەدا، پشتیوان و هاوکار بوون. هەروەها دەبێت بە چاوی ڕێزیشەوە بڕوانینە ئەو ڕەخنە و سەرنجانەی لەسەر دەرچوونی بڕیارەکە هەبوون.

ڕەخنە و دەنگنەدان بە پارێزگابوونی هەڵەبجە، هیچ کەس و لایەنێک ناخاتە خانەی دووژمنایەتی و دژایەتییەوە. ئەوانیش پاساوێکیان بۆ ڕەتکردنەوەکەیان هەبووە. گرنگ بۆ ئێمە پەسندکردنی بڕیارەکە و جێبەجێکردنی و سەرخستنی پڕۆسەکەیە، نەک دژایەتی و بەکارهێنانی پرسەکە بۆ مەرامی دیکە.

بەپارێزگابوونی هەڵەبجە پێویستە کۆکەرەوەی دەنگ و ڕەنگە جیاوازەکان بێت، نەک بکرێتە کەرەستەی دووبەرەکی و دابڕانی زیاتر و دژایەتی یەکتر.

ئێمە دەزانین ئەوانەی ڕەخنەیان لە بڕیارەکە هەبوو، یاخود نەیانویست دەنگی پێ بدەن، دەشێ پاساوەکانیان جێی بایەخ بووبێت، بەڵام ئەمە لەو ڕاستییە کەم ناکاتەوە، کە سەرەڕای هەموو ڕەخنە و پاساوێکیان، دەبێت دان بەوەدا بنرێت، هەڵەبجە ڕەمزی بەرەنگاری سیاسەتی دیکتاتۆری و قوربانی چەکی کیمیاوی و یەکێک لە هۆکارە هەرە سەرەکییەکانی پشتکردنی سیاسەتی نێودەوڵەتیی بوو لە ڕژێمی سەددام، کە سەرەنجامەکەی ڕووخان و هەڵتەکاندن و نەمانی بوو.

هەر بۆیە هیچ عێراقییەک ئەمڕۆ لاری لەوە نییە، هەڵەبجە مافی ڕەوای خۆیەتی قەرەبووی مەعنەوی بکرێتەوە و لەپای ئەو هەموو قوربانییەی پێشکەشی کردووە، شانازی بەپارێزگابوونی پێببڕێت.

وەک خەڵکی هەڵەبجە، پێویستە لەمڕۆە کاری جددی و هەنگاوی گەورە بنێین بۆ بنیاتنانی کۆمەڵگەیەکی نموونەیی لە پارێزگاکەماندا، کۆمەڵگەیەک، کە بە گیانی لێبووردن و تەبایی و ئاشتی هەنگاوی گەورە بنێین و کار بکەین بۆ ئەوەی پارێزگاکە لە هەموو ڕوویەکەوە ببووژێتەوە. ئەمەش بەوە دەکرێت نوێنەران لە بەغداد ساڵانە داکۆکی لە دابینکردنی بودجەی پێویست بۆ بنیاتنانەوەی پارێزگاکە و قەرەبووی خەڵکی سنوورەکە بکرێتەوە.

داواکاریشم لە مامۆستایانی ئایینی، مامۆستایانی زانکۆی هەڵەبجە و کەرتی پەروەردە و کەسایەتییە کۆمەڵایەتییەکان و ڕۆژنامەنووس و ڕۆشنبیرانی سنوورەکە، کاری زیاتر بکەن بۆ خزمەتکردنی شووناسی کۆمەڵایەتی و ئایینی و کولتووری هەڵەبجە و بنیاتنانی کۆمەڵگەیەکی نموونەیی لە سنوورەکە.

دووبارە بە پارێزگابوونی هەڵەبجە لە هەموو لایەکمان پیرۆز بێت.