بۆچی ئاڤام هەڵبژارد؟

میدیاکاری زیندوو، نابێت لە میدیای مردوودا ناوبانگ و مێژووەکەی زیندەبەچاڵ بکات. ئەزانم شوێنگۆڕین لە کوردستان قبوڵکراو نییە، بەڵام کاتێک بزانم مانەوەم یەکسانە بە کۆتاییم، مافی خۆمە، ئەو مێژووەم ڕزگار بکەم، کە بە شەونخونی 20ساڵ کارکردن و هەوڵدان پێیگەیشووم.

بۆچی نەچمە ئاڤا، لەکاتێکدا میدیاکانی پێشخۆی، لاسایی دەکەنەوە، ئەوەشی لاسایی بکاتەوە، چەندین هەنگاو لەدوایە. ئاڤام هەڵبژارد، چونکە نوێ و جیاواز بوو، ئەوەتا خۆتان دەبینن، ئەو میدیایانەی گاڵتەیان بە ئاڤا دەکرد، ئێستا بوونە بە لاسایکەرەوەیەکی بێتامی ئاڤا.

میدیا رووئیای نەبوو، هەر دەبێت سەرقاڵی لاساییکردنەوە بێت. میدیای بەناو سەنگین و پڕۆفیشناڵ، بوونە بە چاولێکەری ئاڤا. میدیاکانی دیکە شەو دەخەون، نازانن سبەی چیدەکەن، بەڵام دوای نیوەڕۆ بەخەبەردێن و بە لاساییکردنەوەی ئاڤا دەست پێدەکەن.

ئاڤام هەڵبژارد، چونکە لێرە ناکوژێمەوە، بەڵکو دەدرەوشێمەوە. من لە رابردوودا قوربانی بووم. خەڵک منی لە بیرچووبووەوە کە ڕۆژگارێک ساحەی شرۆڤە لە میدیا بەدەست منەوە بوو، بۆیە چوونم بۆ ئاڤا، واتە گەڕانەوەم بۆ سرووشتی خۆم. سوێند بە هەموو پیرۆزییەک، لێرە مووچەیەکی زۆر کەمتر لە میدیای پێشووم وەردەگرم، بۆیە بڕیارەکە بۆ پارە نییە.

هەر ئەوەی هەموو میدیاکان بە تازە و کۆنیانەوە لە هەواڵ و گێڕانەوە و پۆستەکانی سۆشیاڵمیدیا و مۆنتاژ لاسایی ئاڤا و بێژەرەکانی دەکەنەوە و خۆیان یەک ئیبداعیان نییە، ئەمە بەسە بۆ ئەوەی من بۆ ئاڤا میدیام هەڵبژارد. تەقلید مانای تەسلیمبوونە بە هێزی ئاڤا میدیا کە ئێستا یەکەمە لە کوردستان.