کۆرمۆر و تاوانی ڕووناککردنەوەی نیشتمان

لە گەرمەی ململانێ جیۆپۆڵەتیکییەکان و هاوکێشە ئاڵۆزەکانی وزە لە ڕۆژهەڵاتی ناوەڕاستدا، کێڵگەی غازی کۆرمۆر لە چەمچەماڵ تەنها ڕووبەرێکی جوگرافی یان کۆمەڵێک بۆری و وێستگەی ئاسن نییە؛ ئەم کێڵگەیە ئێستا بووەتە تاوانباری سەرەکی لە دادگای ئەوانەی حەز بە تاریکی دەکەن، چونکە بووەتە دڵی لێدەری ژێرخانی ئابووری و سیمبوولی مانەوەی هەرێمی کوردستان بە ڕووناکی.

کاتێک دەبینین مووشەک و درۆنەکان ئاراستەی ئەم خاڵە دەکرێن، دەبێت لەوە تێبگەین کە ئامانجەکە تەنها تەقینەوەیەک نییە، بەڵکو سزادانی نیشتمانێکە لەسەر هەوڵەکانی بۆ دەرچوون لە تاریکی.

پەیوەندیی نێوان هاووڵاتی و کۆرمۆر، پەیوەندییەکی ڕاستەوخۆی ژیانییە و تێکەڵ بە خەونەکانیان بووە. ئەم کێڵگەیە ئەو "کلیلە زێڕینە"یە کە دەتوانێت دەرگای خەونی کارەبای 24 کاتژمێری بە ڕووی ماڵەکانی کوردستاندا بکاتەوە. 

لە کاتێکدا حکومەتی هەرێم هەنگاوی جددی ناوە بۆ فراوانکردنی بەرهەمهێنان لەم کێڵگەیەدا بۆ ئەوەی کۆتایی بە تاریکی بهێنێت و چەرخی پیشەسازی بگەڕێنێت، هێرشەکان دێن بۆ پەکخستنی ئەم خەونە.

 هێرشبەران باش دەزانن کە بڕینی غازی کۆرمۆر، واتە کوژاندنەوەی چرای ماڵەکان و پەکخستنی ژیانی خەڵک، ئەمەش کارتێکی فشارە بۆ دروستکردنی ناڕەزایەتیی جەماوەری لە دژی بەرنامەی هەرێم؛ وەک ئەوەی بڵێن هەر هەنگاوێک بەرەو ڕووناکی بنێن، ئێمە بە ئاگر وەڵامتان دەدەینەوە.

ئەوەی لە پشت پەردەی دووکەڵی ئەم هێرشانەوە دەگوزەرێت، جەنگێکە لەسەر پێگەی هەرێمی کوردستان.

نەیارانی ئەزموونی هەرێم بە وردی درکیان بەوە کردووە کە بەهێزبوونی کۆرمۆر، واتە بەهێزبوونی سەربەخۆیی ئابووریی کوردستان.

کاتێک هەرێم دەتوانێت وزەی خۆی دابین بکات و تەنانەت بیر لە هەناردەکردنی بکاتەوە، واتە چیتر پێویستی بەوە نابێت بۆ دابینکردنی وزە و ژیان، مل بۆ دەرەوە کەچ بکات یان لەژێر ڕەحمەتی وزەی دەرەکیدا بێت. بۆیە، هێرشەکان پەیامێکی سیاسی ڕوونیان هەیە: "ڕێگە نادەین ببنە خاوەنی سەروەریی وزەی خۆتان."

ڕەهەندێکی دیکەی قووڵی ئەم هێرشانە، ترساندنی سەرمایەی بیانی و تاریککردنی داهاتووی ئابوورییە.

 کۆرمۆر نموونەی سەرکەوتووی وەبەرهێنانی نێودەوڵەتییە لە کوردستان. بە ئامانجگرتنی بەردەوامی، هەوڵێکە بۆ ئەوەی بە جیهان بڵێن "کوردستان ناوچەیەکی ئارام نییە بۆ پارەکانتان". 

ئەوان دەیانەوێت کۆمپانیاکان ناچار بە کشانەوە بکەن و بەمەش گەمارۆیەکی ئابووری نەبینراو بخەنە سەر هەرێم، تاوەکو پڕۆژە ستراتیژییەکان پەکیان بکەوێت و هیواکان بکوژێنەوە.

کەواتە، دووکەڵی ئەو هێرشانەی دەکرێنە سەر کۆرمۆر، نیشانەی لاوازیی ئەو شوێنە نییە، بەڵکو باجێکە کە کوردستان لەپێناو تاوانی ڕووناککردنەوەی نیشتمان و بەدەستهێنانی سەروەریی وزە دەیدات. پاراستنی کۆرمۆر، لە ڕاستیدا پاراستنی ئەو هیوا و پلانانەیە کە بۆ داهاتوویەکی گەشتر داڕێژراون؛ چونکە تا کۆرمۆر بەپێوە بێت، چرای هیواکانی کوردستان بۆ گەشەکردن و بەهێزبوون هەرگیز ناکوژێتەوە.