کۆبوونەوەی هەزار لیژنە، نە برسییەک تێر و نە بێ بەرگێ پۆشتە دەکات

کە ئازار و کارەسات شاڵاو بۆ مرۆڤ دەهێنێت، کەس لەدەرگەی لیژنە و لیژنەکاری نادات. 

کەس چاوەڕێی ( کتابنا و کتابکم )، ( نووسراومان و نووسراوتان ) ناکات .. کەس ناتوانێ بە خەڵکی برسی بڵێت: بەرێزان چاوەڕێ بن هێشتا لیژنەکانمان کۆنەبووەتەوە!   

سەرما و سۆڵە و تەڕوتووشی و نەخۆشی، بەنیاز نییە چاوەڕێی "ڕێنمایی و تەعلیماتی لیژنە بەڕێزەکان" بکات. 

لە ساتە وەختی نائومێدیدا، ڕاکێشانی دەستی هاوکاری، زۆر زۆر بە بەهاترە لە ڕاپۆرتی ڕەسمیی کۆبوونەوەی لیژنە و کۆمیسیۆنەکان. زۆر ڕاستگۆترە لە لێدوان و سازدانی کۆنفرانسەکان! زۆر میهرەبانترە لە ڕێکارە بیرۆکراتی و ڕۆتینییەکان.
 
ڕاکێشانی دەستی پڕی هاوکاری و کۆمەکی خێرا و دەستبەجێ، نەک هەر پێشێلکردنی سیستم نییە و دەرچوون و لادان نییە لە ڕەوت و یاسا! بگرە ڕزگارکەری مرۆڤایەتی و کۆمەڵە لە پاشاگەردانی و داڕمانی بوونیادی سیستم لە ناخی مرۆڤدا. هەڵوێستێکە لە  ویژدانەوە سەرچاوە دەگرێت نەک لە بڕیاری کۆبوونەوەی لیژنەکانەوە.

هەڵمەت و دەسپێشخەرییە خۆبەخشەکەی ئاڤا میدیا و خەڵکی جوامێری کوردستان لەم تێگەیشتنەوە سەرچاوەی گرتووە و نمایش نییە، چالاکییەکی سەرپێی و بێ ئامانج و بێ مۆراڵیش نییە.

کامێراکانی ئاڤا، بوون بە دەیان چاوی کراوە و بەئاگا لەسەر زام و ئازارەکانی خەڵکی بەشمەینەت.

مایکرۆفۆنەکانی ئاڤا بوون بە دەنگی هاوار و داد و بێدایی خەڵکی بەشخوراوی پەراوێزخراو و گەیاندی بە هەموو کورد.

ئاڤا میدیا چاوەڕێی بڕیاری پێکهێنانی لیژنە و تەواوکردنی لیست و کۆکردنەوەی ژمارە و ناو و ناسنامەکانی نەکرد، ڕاستەوخۆ چووە ناو خەڵک و قوڕ و لیتەی کۆڵان و ناوماڵەکانی چەمچەماڵ و شۆڕش و تەکیە.

کارمەندکانمان ڕووبەڕوو لەوێ هاوخەمی خەڵک بوون، سەرمایان بوو، برسییان بوو، ماندووبوون و بێ خەو بوون و نەخۆشکەوتن.  

ئەو دەمەی دەستی هاوکاریی دەگات بە فریای خەڵکی لێقەوما، مێژوویەک دەنووسرێتەوە و بە هەزاران هەنگاو ڕێکار و تەعلیماتی لیژنە و لیژنەکاری لە پاش خۆیەوە جێ دەهێڵێت!