مانگی ڕابردوو 26 کۆڵبەر لە سنوورەکانی ڕۆژهەڵاتی کوردستان کوژراون و برینداربوون

ئاڤا نیوز 

 

لە ماوەی مانگی تەمموزی ڕابردوودا، زیاتر لە 26 کۆڵبەر لە سنوورەکانی ڕۆژهەڵاتی کوردستانەوە کوژراون و یان بریندار کراون کە 85%ـی ئەو حاڵەتانە بە تەقەی ڕاستەوخۆی هێزەکانی ئێران بوون.

 

زانیاریی بەدەستهاتوو: ڕێکخراوی هەنگاو بۆ مافەکانی مرۆڤ بڵاوی کردەوە، لە مانگی ڕابردوودا پێنج کۆڵبەر بە تەقەی ڕاستەوخۆی هێزەکانی ئێران کوژراون و 21 کۆڵبەریش بریندار کراون، ڕووداوەکانیش لە پارێزگاکانی کرماشان، سنە و ئورمیە بوون.

 

زانیاریی زیاتر: لەنێو ئەو کۆڵبەرانەی کراونتە ئامانج دوو منداڵ بریندارکراون، زۆرترین قوربانییەکان لە سنوورەکانی پارێزگای کرماشان تۆمارکراون.

 

ئەوەی پێویستە بیزانیت: پێشتر ئەرسەلان یارئەحمەدی، سەرۆکی ڕێکخراوی هەنگاو بە ئاڤا نیوزی ڕاگەیاند: لە شەش مانگی یەکەمی ئەمساڵ 38 کۆڵبەر کوژراون، 233 کۆڵبەریش بریندار کراون، ئەم ژمارەیە دوو هێندەی تێکڕای ساڵی پارە و ڕێژەکە زۆر زیادی کردووە.

 

باکگراوند: لە 10 ساڵی ڕابردوودا 589 كۆڵبەر لە ناوچە سنوورییەكانی ڕۆژهەڵاتی كوردستان كوژراون، بەشێكی زۆریشیان بە تەقەی ڕاستەوخۆی سوپای پاسداران بووە.