بەرپرسێکی پارتی: یەکێتی بێ ئێمە لە نەینەوا ڕێککەوتنی نهێنی کرد

ئاڤا نیوز

بەرپرسێکی پارتی دەڵێت یەکێتی بەبێ ئاگاداری ئەوان لە نەینەوا ڕێککەوتنی نهێنی لەگەڵ بزووتنەوەی بابلیۆن کردووە، بەرپرسێکی یەکێتیش دەڵێت دەنگیان بە کاندیدی پارتیش داوە.

لێدوانی فەمی: نازم هەرکی، جێگری بەرپرسی ڕێکخستنی پارتی لە نەینەوا بە ئاڤا نیوزی ڕاگەیاند، یەکێتی دەنگی دوو ئەندامەکەی خۆی لە ئەنجوومەنی پارێزگای نەینەوا داوەتە بزووتنەوەی بابلیۆنی ڕەیان کلدانی، بەو هۆیەوە جێگری دووەمی پارێزگار بەر بزووتنەوەکە کەوتووە.

بۆچی گرنگە: دوای هەڵبژاردنی ئەنجوومەنی پارێزگاکان بەرپرسانی پارتی و یەکێتی جەختیان دەکردەوە بێ یەکتر هیچ ڕێککەوتنێک ناکەن. ئەمە لەکاتێکدایە هێشتا پارێزگاری کەرکووک یەکلانەبووەتەوە و یەکێتی هەوڵی بەدەستهێنانی پۆستەکە دەدات.

بۆچوونی بەرامبەر: غەیاس سورچی، گوتەبێژی یەکێتی لە نەینەوا بە ئاڤا نیوزی ڕاگەیاند، بۆ هەڵبژاردنی هەردوو جێگری پارێزگار دەنگیان داوە، بۆ جێگری یەکەم دەنگیان بە کاندیدی پارتی داوە، بۆ جێگری دووەمیش دەنگیان بە کاندیدی بابلیۆن داوە. گوتیشی "هەر لایەنێکی سیاسی بۆ هەڵبژاردن ڕێککەوتن لەگەڵ لایەنی جیاواز دەکات".

باکگراوند: ڕۆژی 10ـی ئەم مانگە، هەر یەک لە سیروان ڕۆژبەیانی، کاندیدی پارتی وەک جێگری یەکەم و عومەر ئەلمەولا، کاندیدی بزووتنەوەی بابلیۆن بە جێگری دووەمی پارێزگاری نەینەوا هەڵبژێردران.