عێراق: ئاستی ئاو لە بەنداوەکان 700 ملیۆن مەتر سێجا زیادی کردووە

ئاڤا نیوز

وەزارەتی سەرچاوە ئاوییەکانی عێراق ڕایدەگەیێنێت، کۆگای ئاو لە بەنداوەکاندا بەهۆی بارانبارینی بەخوڕەوە بۆ زیاتر لە 700 ملیۆن مەتر سێجا بەرزبووەتەوە، ئەمەش بەرزبوونەوەیەکی بەرچاوە و کاریگەری ئەرێنی لەسەر وڵات هەیە.

وێنە گەورەکە: ماوەی چەند ڕۆژێکی شەپۆلێکی بەخوڕی بارانبارین ڕووی لە هەرێمی کوردستان و عێراق بە گشتی و ناوچەکە کردووە، بەهۆیەوە سەرەڕای دروستبوونی لافاو و کۆبوونەوەی ئاو، ئاستی ئاوی بەنداو و پۆندەکان بە ڕێژەیەکی بەرچاو بەرزبوونەتەوە.

ڕاگەیێنراوی فەرمی: وەزارەتی سەرچاوە ئاوییەکانی عێراق لە ڕاگەیێنراوێکدا، جەخت لەسەر گرنگیی پشتبەستن بە داتاکانی خۆی دەکاتەوە وەک سەرچاوەیەکی دروست و متمانەپێکراو و ڕایدەگەیێنێت زنجیرەیەک ڕێوشوێنی سەرکەوتووی گرتووەتەبەر بۆ بەڕێوەبردنی هاتنەژوورەوەی ئاوی ئەم دواییە کە سوودێکی گەورەی لێکەوتووەتەوە.

ئەوەی ئێستا ڕوودەدات: بەگوێرەی وەزارەتەکە، ئەم سوودانە بریتی بوون لە بەرزکردنەوەی کۆگای ئاو لە بەنداوەکان بۆ زیاتر لە 700 ملیۆن مەتر سێجا بەهۆی بارانبارینی بەخوڕ لە پارێزگا جیاوازەکان و دابینکردنی ئاو بۆ دەریاچەی سەرسار بە زیاتر لە 200 ملیۆن مەتر سێجا دوای ئەوەی بۆ چەندین وەرز ئاو بۆی نەڕۆیشتبوو. هەروەها پشتیوانیکردنی ناوچە زۆنگاوەکان و زیادکردنی ڕێژەی ژێرئاوکەوتنیان لەگەڵ باشترکردنی ژینگەی شەت عەرەب. سەرەڕای دابینکردنی پێداویستییە ئاوییەکانی وەرزی زستانی ئەمساڵ بۆ کشتوکاڵ لە زۆربەی پارێزگاکان کە پشتیوانی بەرهەمی کشتوکاڵی دەکات.

ئەوەی پێشبینی دەکرێت: وەزارەتەکە ئاماژە بەوە دەکات کە ئەم ژمارانە سەرەتایین و لەوانەیە زیاتر ببن بە بەردەوامبوونی کاریگەریی نزمەپاڵەپەستۆ و لافاوەکان.