نوێترین زانیاریی لەسەر پێكهێنانی حكومەتی خۆجێیی كەركووک

ئاڤا نیوز

24 ڕۆژ بەسەر یەكەم دانیشتنی ئەنجوومەنی پارێزگای كەركووك تێپەڕ دەبێت، تاوەكو ئێستا هیچ هەنگاوێكی كردەیی بۆ بەڕێووەچوونی كۆبوونەوەی دووەم و دابەشكردنی پۆستەكان نەنراوە.

وێنە گەورەكە: یەكێتیی لەگەڵ چەند ئەندامێكی عەرەب و توركمان ڕێككەوتنی كردووە لەسەر دابەشكردنی پۆستەكان، بەڵام بەشێكی لایەنە عەرەبییەكان هەڵوێستیان یەكخستووە، كە ئەمەش كاریگەری نەرێنی دەخاتە سەر ئەو ڕێككەوتنە.

ئەوەی پێویستە بیزانیت: ڕۆژی یەكشەممە 04-08-2024 لە سەڵاحەددین سەرۆك بارزانی پێشوازی لە شاندێكی هاوبەشی كوتلەی عەرەبی و توركمانیی ئەنجوومەنی پارێزگای كەركووك و ژمارەیەك پەرلەمانتار و سەركردەی سیاسی بە سەرۆكایەتیی خەمیس خەنجەر كرد، جەختی لە ڕەچاوكردنی مافی سەرجەم پێكهاتەكانی كەركووك كردەوە.

بۆچی گرنگە: شەش ڕۆژ وەك وادەی یاسایی بۆ پێكهێنانی حكومەتی خۆجێی كەركووك ماوە، گەر لەو ماوەیەدا لایەنەكان لەسەر پۆستەكان ڕێكنەكەون، بەپێی یاسا ئەنجوومەنی پارێزگا شەرعیەتی نامێنێت و بۆشایی یاسایی دروست دەبێت. سەرۆكوەزیرانی عێراق خۆی پارێزگارێك بۆ كەركووك دادەنێت.

باكگراوند:دوای نزیكەی حەوت مانگ لە هەڵبژاردنی ئەنجوومەنی پارێزگای كەركووك، ڕۆژی چوارشەممە 10-07-2024 یەكەمین كۆبوونەوەی ئەنجوومەن كرا و لایەنەكان ڕێككەوتن لەماوەی مانگێكدا پۆستەكان دیاری بكەن.

عەرەبەكان داوای چییان كردووە؟
لایەنە براوەكانی كەركووك هەڵوێستەكانیان یەكنەخستووە و بەشێكی لایەنە عەرەبەكان داوایانكردووە دووساڵی یەكەم پۆستی پارێزگار لای ئەوان بمێنیتەوە، بەڵام ڕەتكراوەتەوە.
شۆخان حەسیب، ئەندامی ئەنجوومەنی پارێزگای كەركووك لە فراكسیۆنی پارتی بە ئاڤا نیوزی گوت: "لە كۆبوونەوەیان لەگەڵ سەرۆك بارزانی، لایەنە عەرەبییەكان داوایانكرد دوو ساڵی یەكەم پۆستی پارێزگار لای عەرەب بێت، بەڵام سەرۆك بارزانی ڕەتیكردەوە، چونكە مافی كوردە و ناكرێت بدرێت بە نەتەوەیەكی دیكە."

یەكێتیی: دەمانەوێت پێش كۆتاییهاتنی وادەكە پارێزگار هەڵبژێردرێت
بڕیارە كۆتایی ئەم هەفتەیە دانشتنێكی دیكەی ئەنجوومەنی پارێزگای كەركووك بەڕێوەبچێت، یەكێتیی لەگەڵ كۆتای كرسیتیانەكان، ڕەعد ساڵح لە هاوپەیمانیی قیادە، ئەحمەد حەمدانی لە هاوپەیمانیی عەرەبی و ئەحمەد ڕەمزی لە بەرەی توركمانی ڕێككەوتووە لەسەر ئەوەی پارێزگار دوو ساڵی یەكەم بۆ ئەوان بێت و پۆستی سەرۆكی ئەنجوومەن بدەن بە ئەحمەد حەمدانی، بەڵام هاوپەیمانی عەرەبی دەیانەوێ هەڵوێستەكانیان یەكبخەن و پێداگری لەسەر هێشتنەوەی پۆستی پارێزگار دەكەن.

ئەحمەد كەركووكی ئەندامی ئەنجوومەنی پارێزگای كەركووك لە فراكسیۆنی یەكێتی بە ئاڤا نیوزی گوت:"دەمانەوێت پێش كۆتایی وادەكە و دانانی پارێزگار لەلایەن سوودانی، ڕێككەوین و حكومەتی خۆجێیی پێك بهێنین بۆ ئەوەش هەنگاومان ناوە."

لەبەرامبەردا سەلوە مەفرەجی، ئەندامی ئەنجوومەنی پارێزگای كەركووك لە هاوپەیمانی عەرەبی بۆ ئاڤا نیوز گوتی:"بۆچوونەكانمان یەكخستووە و پۆستی پارێزگار مافی ئێمەیە."

هاوپەیمانییەكانی عرووبە و قیادە بۆچوونی جیاوازیان هەیە 
قیادە و عرووبە دوو كورسی ئەنجوومەنی پارێزگای كەركووكیان هەیە، بۆچوونەكەیان بەتەواوەتی لەیەك دوورە.

پێشووتر وەسفی عاسی، سەرۆكی هاپەیمانیی عرووبە لە پەیامێكدا ئاماژەی بەوەدا، بەشێكی لایەنە عەرەبییەكان لەپێناو بەرژەوەندیی خۆیان و كۆمپانیاكانیان دەیانەوێ دەستبەرداری پۆستی پارێزگار بن، "ئەگەر ئەوە ڕووبدات شەقامی عەرەبی دەجوڵێنین و خۆپێشاندان دەكەین".

ڕەعد ساڵح، ئەندامی ئەنجوومەنی پارێزگای كەركووك لە هاوپەیمانی قیادە بە ئاڤا نیوزی گوت: "لە كۆتایی ئەم هەفتەیە كۆبوونەوە دەكرێت و گرفتمان لەگەڵ ئەوەدا نییە، كە دوو ساڵی یەكەم پۆستی پارێزگار بۆ كورد بێت."