ئەنجوومەنی پارێزگای کەرکووک لە بەغدا بۆ هەڵبژاردنی پارێزگار کۆدەبێتەوە

ئاڤا نیوز 

بڕیارە ئەمشەو ئەنجوومەنی پارێزگای کەرکووک لە بەغدا کۆببێتەوە و پارێزگار و سەرۆکی ئەنجوومەن یەکلایی بکاتەوە.

 

چیرۆکی سەرەکی: دوو کاتژمێر  بەسەر ئەو وادەیەدا تێپەڕیوە کە بۆ بەڕێوەچوونی کۆبوونەوەی ئەنجوومەنی پارێزگای کەرکووک لە هۆتێل ڕەشیدی بەغدا دیاریکرابوو، ئێستاش سەرکردەی لایەنە سوننە و شیعەکان، لەگەڵ بافڵ تاڵەبانی، سەرۆکی یەکێتی و نوێنەری محەممەد شیاع سوودانی، سەرۆکوەزیرانی عێراق لە ماڵی محەممەد حەلبووسی، سەرۆکی حیزبی تەقەدووم لەکۆبوونەوەن.

زانیاریی پەیامنێر: بەگوێرەی ئەو زانیارییانەی ڕۆکان مەحموود، نێردراوی ئاڤا لە بەغدا لە ئەندامێکی ئەنجوومەنی پارێزگای کەرکووک لە پشکی یەکێتی وەریگرتوون، بڕیارە ئەمشەو کۆبوونەوەی ئەنجوومەن بکرێت و پۆستی پارێزگار و سەرۆکی ئەنجوومەن یەکلایی بکرێنەوە.

زانیاریی زیاتر: ڕەزامەندی لەسەر ناوی ڕێبوار تاڵەبانی دراوە بۆ ئەوەی ساڵێک و چوار مانگی یەکەم ببێت بە پارێزگاری کەرکووک و محەممەد حافز لە کوتلەی عەرەبی بکرێت بە سەرۆکی ئەنجوومەن، هاوکات پۆستەکانی دیکە لە کۆبوونەوەیەکی دیکەی ئەنجوومەن بە ئامادەبوونی سەرجەم فراکسیۆنەکان یەکلایی دەکرێنەوە.

گۆشەیەکی دیکە:   پارتی دیموکراتی کوردستان و تورکمانەکان کە هەر یەکێکیان خاوەنی دوو ئەندامی ئەنجوومەنن، ڕەتیدەکەنەوە بەشداری کۆبوونەوەکە بکەن. کاوە ئەحمەد، کارگێری لقی دووی پارتی لە کەرکووک ئێوارەی ئەمڕۆ بە ئاڤا نیوزی گوت، "ئاگادار نەکراوینەتەوە و لە کۆبوونەوەکەدا بەشداری ناکەین."

ئەوەی پێویستە بیزانیت: سبەی ئەو وادەیەی بۆ دیاریكردنی پارێزگار و دابەشكردنی پۆستەكانی پارێزگای كەركووك دیاریكراوە كۆتایی دێت، لە ئەگەری ڕێکنەکەوتنی لایەنەکان بۆشایی یاسایی لە کەرکووک دروست دەبێت، بەئەگەری زۆریشەوە پارێزگارێک بەوەکالەت لەلایەن سوودانییەوە دادەنرێت.