ناتۆ و ترەمپ وەڵامی یەكتر دەدەنەوە

ئاڤا نیوز

دۆناڵد ترەمپ، سەرۆكی پێشووی ئەمریكا هانی ڕووسیا دەدات هێرشبكاتە سەر ئەو وڵاتانەی ئەندامی ناتۆن و ئەركە داراییەكەیان جێبەجێناكەن، سكرتێری ناتۆش دەڵێت هەرپێشنیارێك كە هاوپەیمانیەتیەكە تێكبدات ئاسایشی ئەمریكاش دەخاتەمەترسییەوە.

لێدوانە فەرمییەكان: دۆناڵد ترەمپ سەرۆكی پێشووی ئەمریكا ڕایگەیاند: ئەگەر ئەندامانی ناتۆ ئەركەداراییەكانیان جێبەجێنەكەن هانی ڕووسیا دەدەم هێرشبكاتە سەریان.

لەلایەكی دیكەوە: یەنس ستۆڵتنبێرگ، سكرتێری گشتیی ناتۆ ڕایگەیاند: هەر پێشنیاز و قسەیەك ببێتە هۆی هەڵوەشانەوە یان لێكترازانی هاوپەیمانیەتی ناتۆ، ئاسایشی هەموو جیهان بە ئەمریكاشەوە دەكەوێتە مەترسییەوە.

هاوكات، ئەندرۆ بیتس گوتەبێژی كۆشكی سپی ڕایگەیاند: هاندانی رژێمە تاوانبارەكان بۆ داگیركردنی وڵاتانی هاوپەیمانمان شتێكی ترسناك و شێتانەیە.

باكگراوند: كەمپینی هەڵبژاردنەكانی سەرۆكایەتی ئەمریكا بەردەوامن، لە مانگی 11دا هەڵبژاردن دەكرێت، كێبڕكێی تووند لە نێوان جۆ بایدن ودۆناڵد ترەمپ و چەند كاندیدێكی دیكەدا هەیە، ترەمپ لە كەمپینەكانیدا چەندین جار ڕەخنەی توندی لە كارەكانی ناتۆ گرتووەو بەخەمسارد ناویان دەبات.