یەکێتی هەوڵ بۆ کۆبوونەوەی ئەنجوومەنی پارێزگای کەرکووک دەدات

ئاڤا نیوز

 یەکێتی هەنگاوەکانی پێکهێنانی حکومەتی خۆجێیی لە کەرکووک خێرادەکات، ئامانجییەتی پێش کۆتایی ئەم هەفتەیە کۆبوونەوەیەکی دیکەی ئەنجوومەنی پارێزگا بکرێت و دەنگ لەسەر چەند گۆڕانکارییەک بدرێت.

وێنە گەورەکە: سێ ڕۆژ بەسەر هەڵبژاردنی پارێزگار، جێگرەکەی و سەرۆکی ئەنجوومەنی پارێزگای کەرکووک تێدەپەڕێت، تاوەکو ئێستا نزیکەی 20 پۆست بۆ لایەنەکانی عەرەب، 18 پۆست بۆ لایەنەکانی تورکمان و پێنج پۆست بۆ کورد دانراوە.

زانیاریی بەدەستهاتوو: بەگوێرەی زانیارییەکانی ڕۆکان مەحموود پەیامنێری ئاڤا لە کەرکووک، یەکێتیی دەیەوێت ڕۆژی پێنجشەممە 15-08-2024 کۆبوونەوەی ئەنجوومەنی پارێزگا بکرێت، بۆ ئەوەی دەنگ لەسەر گۆڕانکارییە ئیدارییەکانی قەزاکانی داقوق، حەویجە و  دووبز بدرێت.

لێدوانی فەرمی: پەروین فاتیح، ئەندامی فراکسیۆنی یەکێتیی لە ئەنجوومەنی پارێزگای کەرکووک بە ئاڤا نیوزی گوت: "بانگەوازی سەرۆکی ئەنجوومەنی پارێزگەیان بۆ کۆبوونەوە بەدەست نەگەیشتووە، هەوڵ بۆ ئەوەیە لە ماوەیەکی کورتدا حکومەتی خۆجێیی کەرکووک پێکبهێنرێت."

ئەوەی پێویستە بیزانیت: شەوی شەممە 10-08-2024 ئەنجوومەنی پارێزگای کەرکووک بە بەشداریی نۆ ئەندام لە بەغدا  کۆبووەوە، ڕێبوار تەها وەک پارێزگار، ئیبراهیم تەمیمی وەک جێگری پارێزگار و  محەممەد حافز وەک سەرۆکی ئەنجوومەنی پارێزگا هەڵبژێردران.