وەزیری دەرەوەی عێراق گەیشتە ئەنقەرە

ئاڤا نیوز

 

وەزیری دەرەوەی عێراق بە سەرۆکایەتی شاندێکی باڵای ئەمنیی، گەیشتە ئەنقەرەی پایتەختی تورکیا و بڕیارە سبەی لەگەڵ بەرپرسانی ئەمنیی ئەو وڵاتە تاوتوێی کۆمەڵێک بابەت بکەن.

وێنە گەورەکە: ڕۆژی پێنجشەممە 15-08-2024 چوارەم کۆبوونەوەی شاندی ئەمنی نێوان تورکیا و عێراق بۆ پەرەدان بە پەیوەندییەکان و کاری هاوبەشی نێوان هەردوو وڵات بەڕێوەدەچێت. 

لێدوانی فەرمی: فوئاد حوسێن، وەزیری دەرەوەی عێراق لە پۆستێکدا لە تۆڕی (X) ڕایگەیاند: "گەیشتووینەتە ئەنقەرەی پایتەختی تورکیا بۆ ئەنجامدانی کۆمەڵێک کۆبوونەوەی گرنگ، لەنێویاندا دیدارێک لەگەڵ هاکان فیدان وەزیری دەرەوە".

زانیاریی زیاتر: بە گوتەی فوئاد حوسێن، لە کۆبوونەوە لەگەڵ هاوتا تورکییەکەی کۆمەڵێک بابەت تاوتوێ دەکەن "کە جێی بایەخی هەردوو وڵاتە، دیارترینیان لایەنی ئاسایش و بەرەنگاربوونەوەی تیرۆر، هاوکات پتەوکردنی هاوکاری و هەماهەنگییەکان کە لە بەرژەوەندی هەردوو وڵاتەکەماندایە".

ئەوەی پێویستە بیزانیت: لە میانی سەردانەکەی سەرۆککۆماری تورکیا بۆ عێراق لە 22ی نیسانی ئەمساڵ، 26 یادداشتی لێکتێگەیشتن و ڕێککەوتن لەنێوان هەردوو وڵات لە بواری ئەمنی و گەشەپێدان واژۆ کران.