مەسرور بارزانی: سەرکەوتنی پارتی سەرکەوتن و پێشکەوتن و ئاوەدانیی کوردستانە

ئاڤا نیوز

 

لە ساڵیادی دامەزراندنی پارتی و ساڵڕۆژی لەدایكبوونی سەرۆک بارزانی، مەسرور بارزانی، جێگری سەرۆكی پارتی، پەیامێكی بڵاو كردەوە و ڕایگەیاند، سەرکەوتنی پارتی سەرکەوتن و پێشکەوتن و ئاوەدانیی کوردستانە.

 

وێنە گەورەكە: 78 ساڵ بەر لە ئەمڕۆ، لە ساڵی 1946 پارتی دیموكراتی كوردستان دامەزرا، هاوكات سەرۆک بارزانیش لە سابڵاغی ڕۆژهەڵاتی كوردستان لەدایک بوو.

 

ڕاگەیێنراوی فەرمی: مەسرور بارزانی لە ڕاگەیێنراوێكدا وێڕای پیرۆزبایی دەڵێ: پارتی هەر لە ڕۆژی یەکەمی دامەزراندنییەوە لەسەر دەستی ڕابەری بزووتنەوەی ڕزگاریخوازی کورد بارزانیی نەمر، هەمیشە قوتابخانەی کوردایەتی و نیشتمانپەروەریی و حیزبی هەموو چین و توێژ و پێکهاتە جۆراوجۆرەکانی کوردستان بووە.

 

زانیاریی زیاتر: مەسرور بارزانی ئەوەشی ڕاگەیاندووە، پارتی خاوەنی مێژووییەکی پڕ لە سەروەری و فیداکاری و بەرگریکردنە لە مافە نەتەوەیی و نیشتمانییەکانی گەلی کوردستان و ئەمڕۆش بەهۆی سەرکردایەتیی دووربینانە و لێهاتووانەی جەنابی سەرۆک و دڵسۆزی و لەخۆبردوویی ئەندامان و جەماوەر و لایەنگرانی پارتی، پارتیمان یەکێکە لە گەورەترین و بەهێزترین و کاریگەرترین حیزبەکانی کوردستان و عێراق و ناوچەکە.

 

ئەوەش بزانە: لە بەشێكی دیكەی پەیامەكەیدا مەسرور بارزانی دەڵێ: پارتی تاکە ئومێدی خەڵکی کوردستانە، چاوەڕوانین ئەندام و لایەنگرانی پارتی، بە هەموو گوڕ و تین و دڵسۆزیێکەوە، بەشداریی لە هەڵبژاردنی پەرلەمانی کوردستاندا بکەن بۆ ئەوەی وەک هەمیشە، پارتی هێزی یەکەم و پێشەنگی کوردستان بێت، چونکە سەرکەوتنی پارتی، سەرکەوتن و پێشکەوتن و ئاوەدانیی کوردستانە.