ورچە کوژراوەکە مۆمیا دەکرێت

ئاڤا نیوز  

دوای ئەوەی لە کوێستانی باڵەکایەتی ورچێکی قاوەیی بە کوژراوی دۆزرایەوە، ئیدارەی سەربەخۆی سۆران بڕیاریداوە، ورچەکە لە چیا بهێنێتە خوارەوە و مۆمیای بکات.

وێنە گەورەکە: بەهۆی هەڵکەوتەی ناوچەی شاخاوی و چیایی هەرێمی کوردستان، چەندین جۆر ئاژەڵی کێوی و دەگمەن لە چیاکان دەژین و بە فەرمی ڕاوکردنیان قەدەغەیە.

لێدوانی فەرمی: هەژار ماهیر، بەڕێوەبەری فەرمانگەی ژینگەی سۆران بە ئاڤا نیوزی ڕاگەیاند: لەسەر داخوازی ئیدارەی سەربەخۆی سۆران، نۆ تیمی بەرگریی شارستانی سۆران دوای نیوەڕۆی ئەمڕۆ هەینی بەڕێ کەوتوون بۆ شوێنی ورچە کوژراوە و دەیهێننە خوارەوەو بڕیارە مۆمیا بکرێت.

زانیاریی زیاتر: هەژار ماهیر دەڵێت: دوای ئەوەی لەلایەن تیمێکی پسپۆڕ لە هەولێر کاری مۆمیاکردنی تەواو دەبێت، لە "ناشناڵ پارکی هەڵگورد – سەکران" دادەنرێت.

ئەوەی پێویستە بیزانیت: بەگوێرەی ڕێنمایی ژمارە (1)ی ساڵی 2023ی دەستەی چاککردن و پاراستنی ژینگە هەر کەسێک ورچی قاوەیی ڕاو بکات سزاکەی 10 ملیۆن دینارە، ئەگەر ساغبێتەوە هەر کەسێک ورچی قاوەیی دەکوژێت سزاکەی 20 ملیۆن دینار دەبێت.