بە هۆی ئاگرەکەی ئیزمیر زیاتر لە سێ هەزار کەس ماڵەکانیان چۆڵ کردووە

ئاڤا نیوز 

ئاگرێکی گەورە دارستانەکانی ئیزمیری گرتووەتەوە، بەهۆی مەترسی ئاگرەکە لە پێنچ شارۆچکەی ئەو وڵاتە بە گشتی سێ هەزار و 583 کەس ماڵەکانیان چۆڵ کردووە.

چیرۆکی سەرەکی: سێ ئاگری گەورە دارستانەکانی ئیزمیری گرتەوە، بەهۆی تووندی باوە زۆر بە خێرایی تەشەنەی کرد بۆ ناو گەڕەک و ماڵەکان،  لەسەرانسەری وڵات بە درێژایی شەو هەوڵدان بۆ کۆنترۆڵکردنی بەردەوام بوو. وەک ڕێکارێکی خۆپارێزی لە ئیزمیر، ئایدن، بۆلو، موگلا و مانیسا بە گشتی سێ هەزار و 583 کەس بۆ ناوچە ئارامەکان گواستراونەتەوە.

لێدوانی فەرمی: ئیبراهیم یوماکلی، وەزیری کشتوکاڵ و دارستان  گوتی: دوێنی بە تەواوی ڕۆژەکە 72 ئاگر بە دوای یەکەوە دروست بوو، 45ی کۆنترۆڵ کراوە و 27ی بەردەوامین لە هەوڵدان بۆ کۆنترۆڵ کردنی.  

هۆکارە زانراوەکان: سێ کەس کە بۆ گەشتکردن لە نێو دارستانەکان ئاگرییان کردووەتەوە، ئاگرەکە بەهۆی باوە خێرا تەشەنەی کردووە و لە کۆنترۆڵ دەرچووە، شەش کەسی دیکەش لە شارۆچکەی بۆڵو دەستبەسەرکران.

زیانە سەرەکییەکان: 17 خانوو سووتا، 105 ماڵ چۆڵ کران، 44 شوێنی کار چۆڵ کران، سێ هەزار و 583 کەس لە پێنج شارۆچکە ماڵەکانیان چۆڵ کردووە.