لێندسی گراهام بۆ سعوودیە: بێدەنگ مەبن لە بەرامبەر کوشتاری کورد "پیاوانە" مامەڵە بکەن

 

ئاڤا نیوز

 

لێندسی گراهام، سێناتۆری دیاری کۆمارییەکان و نزیک لە دۆناڵد ترەمپ، بە توندی ڕەخنە لە بێدەنگیی سعودیە دەگرێت بەرامبەر هێرشەکانی حکوومەتی نوێی سووریا بۆ سەر کورد و داوای هەڵوێستی جددییان لێدەکات.

بۆچی گرنگە: ئەمە دووەمجارە گراهام زەنگی مەترسی لێدەدات. ئەو هۆشداری دەدات کە جێهێشتنی کورد "ئابڕووچوونە" بۆ ئەمریکا، لە کاتێکدا واشنتن هەوڵ دەدات هاوسەنگیی لە نێوان پەیوەندی لەگەڵ حکوومەتە نوێیەکەی دیمەشق و پاراستنی ڕۆژئاوای کوردستان ڕابگرێت.

لێدوانی فەرمی: گراهام پێی وایە سعوودیە "کاریگەریی زۆری" بەسەر ئەحمەد شەرع و حکوومەتی نوێی سووریادا هەیە. داوا لە ڕیاز دەکات ئەو فشارە بەکاربهێنن بۆ ڕاگرتنی خوێنڕێژی، نەک تەنیا تەماشاکەر بن.

- کاتی ئەوە هاتووە هێزەکانی ناوچەکە ڕەفتاریان بگۆڕن و پیاوانە مامەڵە بکەن.

- دەستبەرداربوونی کورد ئابڕووچوونە بۆ ناوبانگ و بەرژەوەندییەکانی ئاسایشی نیشتمانیی ئەمریکا."

- گراهام دەڵێت زۆر هەوڵی داوە پەیوەندییەکانی ئەمریکا و سعوودیە باش بکات، بەڵام بێدەنگیی ئەوان بەرامبەر هێرشەکانی شەرع بۆ سەر کورد "جێگەی قبووڵ نییە".

لەلایەکی دیکە: ئەمەش لە کاتێکدایە کە دۆناڵد ترەمپ، سەرۆکی ئەمریکا کەمێک پێش ئێستا ڕایگەیاند پەیوەندییەکی "نایاب"ی لەگەڵ ئەحمەد شەرع ئەنجام داوە.

هەنگاوی داهاتوو: لێندسی گراهام پڕۆژە یاسایەکی بە ناوی "کورد بپارێزن" ئامادە کردووە و بڕیارە ئەم هەفتەیە پێشکەشی کۆنگرێسی بکات بۆ ئەوەی پارێزگاری کوردی سووریا بکات