هێمن میرانی: کۆکردنەوە و ناردنی هاوکارییەکان بۆ ڕۆژئاوای کوردستان تەنیا لە ڕێگەی لایەنە فەرمییەکان دەبێت

ئاڤا نیوز

 

وەزارەتی ناوخۆی حکومەتی هەرێمی کوردستان سەبارەت بە کۆکردنەوە و ناردنی هاوکارییەکان بۆ ڕۆژئاوای کوردستان دەڵێت، تەنیا لە ڕێگەی لایەنە فەرمییەکانەوە دەبێت.

وێنە گەورەکە: لە ڕێککەوتی 22-1- 2026، وەزارەتی ناوخۆ، لە ڕێگەی پارێزگاکان و ئیدارە سەربەخۆکان، هەڵمەتێکی گەورەی لە سەرتاسەری هەرێمی کوردستان بۆ کۆکردنەوەی کۆمەک و هاوکاری بۆ ڕۆژئاوای کوردستان ڕاگەیاند، ئێستا پرۆسەی گەیاندنی شتومەکە کۆکراوەکان بە شێوەیەکی سەلامەت لە ڕووی لۆجیستی و ئیدارییەوە دەستیپێکردووە.

لێدوانی فەرمی: د. هێمن میرانی، به‌ڕێوه‌به‌ری گشتیی دیوانی وه‌زاره‌تی ناوخۆ بە ئاڤا میدیای ڕاگەیاند، هەموو کۆمەک و هاوکارییەکان لە ڕێگەی پارێزگاکان و ئیدارە سەربەخۆکان و بەڕێوەبەرایەتیی ناوەندی هاوبەشی هەماهەنگیی قەیرانەکان سەرپەرشتی دەکرێن و بۆ ڕۆژئاوای کوردستان دەنێردرێن.

- ئاماژە بەوە دەکات، کۆکردنەوەی هاوکارییەکان تاوەکو ئێستا بەردەوامە، بۆیە بڕی ئەو هاوکارییانەی کە دەگاتە لایەنە فەرمییەکان، "گۆڕانکارییان بەسەر دێ و ناتوانین بڵێن کە چەندی کۆکراونەتەوە".

لەلایەکی دیکەوە؛ ڕۆژی دووشەممە 26-1-2026، وەزارەتی ناوخۆ لە ڕوونکردنەوەیەکدا، هۆشداری دا کە هیچ کەس و لایەنێک لە خۆیەوە کەلوپەل و کۆمەک نەباتە سەر سنوور، لەبەر ئەوەی ئەم پرۆسەیە پێویستی بە ئامادەکاری و ڕەزامەندیی پێشوەختە هەیە. داواش دەکات هاووڵاتییان بۆ هەر کۆمەکێک سەردانی بەڕێوەبەرایەتییەکانی کۆچ و کۆچبەران بکەن تاوەکوو هاوکارییەکانیان بە شێوەیەکی ڕێکوپێک بگاتە دەستی لێقەوماوان.

- بەپێی ڕوونکردنەوەکەی وەزارەتی ناوخۆ، بەڕێوەبەرایەتییەکانی کۆچ و کۆچبەران و وەڵامدانەوەی قەیرانەکان لە پارێزگا و ئیدارە سەربەخۆکان، ئەرکی کۆکردنەوە، ڕێکخستن، پۆلێنکردن و گواستنەوەی کەلوپەلەکان بۆ ڕۆژئاوای کوردستان لە ئەستۆ دەگرن.