ترەمپ و ئەردۆغان لەبارەی ڕۆژئاوای کوردستان بە تەلەفۆن قسەیان کرد

ئاڤا نیوز

 

میدیای تورکیا بڵاوی کردەوە ترەمپ و ئەردۆغان لەبارەی ڕۆژئاوای کوردستان و ئەنجوومەنی ئاشتی غەززە بە تەلەفۆن قسەیان کرد.

 

بڵاوکراوەی فەرمی: میدیای تورکیا دەڵێت: لە میانی پەیوەندییەکەدا، هەردوو سەرکردە گفتوگۆیان کرد لەبارەی پەیوەندییە دووقۆڵییەکانی نێوان تورکیا و ویلایەتە یەکگرتووەکان، دواین پێشهاتەکانی سووریا، چالاکییەکانی "ئەنجوومەنی ئاشتیی غەززە"، هەماهەنگی لە بواری پیشەسازیی بەرگری، پەیوەندییە بازرگانییەکان، هەروەها پرسە هەرێمی و جیهانییەکان.

 

- ئەردۆغان ڕایگەیاند تورکیا بەردەوام دەبێت لە گرتنەبەری هەنگاوەکان بۆ بەهێزکردنی هاوکارییەکان لەگەڵ ویلایەتە یەکگرتووەکان و، جەختی کردەوە کە پەرەپێدانی پەیوەندییەکان لە هەموو بوارەکاندا لە بەرژەوەندیی هاوبەشی هەردوو وڵاتدایە.

 

- دووپاتی کردەوە کە تورکیا گرنگییەکی زۆر دەدات بە جێبەجێکردنی تەواوەتیی ڕێککەوتنی ئاگربەست و تێکەڵبوونەوە لە سووریای دراوسێ، ئاماژەی بەوەش دا کە ئەنقەرە بە هەماهەنگی لەگەڵ بەرپرسانی ئەمریکا و سووریا، بە وردی چاودێریی پرۆسەکە دەکات.

 

لەلایەکی دیکە: هەروەها ئەردۆغان هیوای خواست کە "ئەنجوومەنی ئاشتیی غەززە" کار و چالاکیی بەسوود ئەنجام بدات و جەختی کردەوە کە کۆتاییهێنان بە کارەساتی مرۆیی لە غەززە و ئاوەدانکردنەوەی ناوچەکە، یارمەتیدەر دەبێت بۆ خۆشکردنی زەمینەی ئاشتییەکی بەردەوام لە ناوچەکەدا.