پارێزگاری هەولێر هۆكاری بوونی پاڵاوگە نایاساییەكان ئاشكرا دەكات

ئاڤا نیوز  

پارێزگاری هەولێر ئاشكرای دەكات، پاڵاوگە نایاساییەكان زیاتر لە 15 ساڵە هەن، هۆكاری هەبوونیشیان ئاشكرا دەكات.

وێنە گەورەكە: پارێزگای هەولێر هەڵمەتێکی بۆ کەمکردنەوەی کاریگەرییەکانی دروستبوونی ئەو تەمە چڕەی ئاسمانی هەولێری گرتووەتەوە دەستپێکردووە، بڕیارە سەرجەم پاڵاوگە نایاساییەکان دابخرێن و ببرێنە دەرەوەی شار.

لێدوانی فەرمی: ئومێد خۆشناو، پارێزگاری هەولێر ڕایگەیاند: بابەتی داخستنی پاڵاوگە نایاساییەكان، بابەتێك نییە هەڵمەتێكی چەند ڕۆژە بێت، تەمەنی ئەو پاڵاوگانە هەفتە و مانگ نییە بەڵكو زیاتر لە 15 ساڵە هەن.

هۆكارە زانراوەكان: پارێزگاری هەولێر ئاماژەی بەوەداوە، لە كاتی خۆیدا ئەو پاڵاوگانە پێویستیی ناوخۆیی سووتەمەنیان دابین كردووە، هەروەها بازرگانی و بژێوی ژیانی چەندین كەس بووە كە پارەیەكی زۆریان لەو پڕۆژانە خەرج كردووە، پاڵاوگە هەیە ملیۆنان دۆلار لە دروستكردنی خەرج كراوە، ئەمانە هۆكاری مانەوەیان بوونە لەو چەند ساڵەدا.

زانیاریی زیاتر: ئەوەی ئێستا گرنگە ئەوەیە ڕووبەڕووی هەموو ئەو پاڵاوگانە دەوەستینەوە كە دەبنە هۆی پیسكردنی ژینگە، ئەمە بەهیچ جۆرێك سازشی لەسەر ناكرێت، دادەخرێن تا ئەو كاتەی كە مەرجە ژینگەییەكان جێبەجێ دەكەن.