گوتەبێژی بارەگای بارزانی: ڕێككەوتنی چەواشەكاری چارەنووسی شكستە

ئاڤا نیوز  

گوتەبێژی بارەگای بارزانی، سەبارەت بە دۆخی ئێستای کەرکووک دەڵێت، کەرکووک دڵی کوردستانە و هەرگیز سازش لەسەر کوردستانیبوونی ناکەین.

وێنە گەورەکە: لە ڕۆژی 10-08-2024، لە بەغدا بەبێ ئامادەبوونی پارتی، پێکهاتەی تورکمان و بەشێکی هاوپەیمانیی عەرەبی، پارێزگار و سەرۆکی ئەنجوومەنی پارێزگای کەرکووک هەڵبژێردران، قەیس خەزعەلی، ئەمینداری گشتیی عەسائیبی ئەهلی حەق ئاشکرای کرد "یەکێتی ڕازی بوو بە پاراستنی ناسنامەی عێراقیبوونی شارەکە".

بڵاوکراوەی فەرمی: د. خالیدە خەلیل، گوتەبێژی بارەگای بارزانی لە لاپەڕەی خۆی لە تۆڕی کۆمەڵایەتی ئێکس، ڕایگەیاند: هەرگیز سازش لەسەر کوردستانیبوونی کەرکووک ناکەین، چونکه کەرکووک دڵی کوردستانە، هەروەک چۆن سازش لەسەر کوردستانیبوونی  ناوچە کوردستانییەکانی دەرەوەی ئیدارەی هەرێم ناکەین.

زانیاریی زیاتر: بۆ دۆخی کەرکووک دەبوو ڕێککەوتن لەنێوان سەرجەم پێکهاتە و لایەنەکان بکرێت، نەک هەندێ ناوچەی دیکەی گرنگی کوردستان بکرێتە قوربانی، یان پێگەو پۆستەکانی کورد بفرۆشرێن بۆ ئەوەی ئەم پارێزگایە بخرێتە نێو ئەجێندایەکی نامۆ کە هەندێ لایەن کاری بۆ دەکەن. د. خالیدە خەلیل وادەڵێت.

ئەوەی پێویستە بیزانیت: گوتەبێژی بارەگای بارزانی سەبارەت بە ڕێککەوتنەکەی کەرکووک دەڵێت: ئەو ڕێککەوتنانەی بەشێوەی چەواشەکاری ئەنجام دەدرێن درەنگ بێ یان زوو چارەنووسیان تەنیا شکستە.