سەرۆک بارزانی ڕێنمایی نوێ بە کوتلەی وەزاریی پارتی دەدات

ئاڤا نیوز  

سەرۆک بارزانی لەگەڵ کوتلەی وەزاریی پارتی دیموکراتی کوردستان کۆدەبێتەوە و بۆ زیاتر خزمەتکردنی هاونیشتمانییان ڕێنمایی نوێیان پێدەدات.

چیرۆکی سەرەکی: ئەمڕۆ شەممە سەرۆک بارزانی بە ئامادەبوونی سەرۆکوەزیران مەسروور بارزانی، کوتلەی وەزاری پارتی بانگهێشت کرد و چەند ڕێنماییەکی پێدانن بۆ زیاتر خزمەتکردنی هاووڵاتیان، گوێشی لە داواکارییەکانیان و وردەکاریی کارەکانیان گرت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆ لە وەزارەتی شارەوانی و گەشتوگوزار بە ئاڤا نیوزی گوت: "سەرۆک بارزانی لە کۆبوونەوەکەدا ئاماژەی بەوە دا دەبێت چەقی کارکردنی کوتلەی وەزاری لە سەرۆکوەزیران تاوەکو فەرمانبەرێکی ئاسایی خزمەتکردن و ڕەزامەندی هاووڵاتیان بێت، هەموو هەوڵێکی حکومەت بۆ پێشکەشکردنی زۆرترین خزمەتگوزاری بێت".

زانیاریی زیاتر: لە کۆبوونەوەکەدا سەرۆک بارزانی باسی لەوە کردووە ئەم کابینەیەی حکومەت لەژێر گوشارێکی زۆردا بووە، بەڵام بەهۆی تواناکانی سەرۆکوەزیران بارزانی، بە خۆڕاگرییەوە مامەڵەی کردووە.

ئەوەش بزانە: ئاری ئەحمەد ڕوونیشی کردەوە " سەرۆک بارزانی ڕایگەیاندووە پاڵپشتیی تەواوی حکومەت دەکات، لەبەرامبەردا کوتلەی وەزاری بەڵێنیان داوە هەرچی لەتوانایاندا بێت بۆ خزمەتکردنی هاووڵاتیان بیکەن".