سەرۆکی ئەنجوومەنی پارێزگای کەرکووک بەڵێنێک بە پێکهاتەکان دەدات

ئاڤا نیوز

سەرۆکی ئەنجوومەنی پارێزگای کەرکووک دەستبەکار بوو،  لە کۆنگرەیەکی ڕۆژنامەوانیشدا بەڵێنی دا لە بڕیارداندا بەشداری بە هەموو پێکهاتەکان بکەن.

چیرۆکی سەرەکی: ئەمڕۆ یەکشەممە محەممەد ئیبراهیم حافز، سەرۆکی ئەنجوومەنی پارێزگای کەرکووک چووە باڵەخانەی ئەنجوومەنەکە و دەستبەکار بوو، بەڵام بەهۆی تەواونەبوونی ڕێژەی یاسایی، ئەنجوومەنەکە نەیتوانی یەکەم کۆبوونەوەی خۆی بکات.

لێدوانی فەرمی: محەممەد ئیبراهیم حافز لە کۆنگرەیەکی ڕۆژنامەوانیدا ڕایگەیاند: " بە یەکچاو سەیری هەموو پێکهاتەکان دەکەین و وەکو بێلایەن لەنێوان هەموویاندا دەوەستین". لەبارەی دامەزراندنیشەوە گوتی: "بە هەموو شێوەیەک هاوکار دەبین لەوەی ئەوانەی گرێبەستیان هەیە بکرێن بە هەمیشەیی و ئەوانەی بێکارن گرێبەستیان بۆ بکرێت".

زانیاریی زیاتر: "بەڵێنی ئەوەتان پێدەدەم بە هەموو شێوەیەک پێکەوە کار دەکەین، بۆ ئەوەی باشترین پرۆژەی خزمەتگوزاری پێشکەشی کەرکووک بکەین. لەگەڵ پارێزگار بەڵێنمان داوە  بەشداری بە هەموو پێکهاتەکان بکەین  لە بڕیارەکانماندا" محەممەد ئیبراهیم وای گوت.

لەلایەکی دیکەوە: ڕێبوار تەها، پارێزگاری کەرکووک دوای پیرۆزبایی دەستبەکاربوونی سەرۆکی ئەنجوومەن ڕایگەیاند: "ئامانجی سەرەکیمان پێکەوەژیانە، بۆ ئەوەی ئەمەش بێتەدی، پێویستە جیاوازی نەکەین و وەک یەک تیم کار لەپێناو پێشکەشکردنی باشترین خزمەتگوزاری بکەین بۆ هەموو دانیشتووانی کەرکووک بێ جیاوازی".