لە ماوەی 15 ڕۆژدا سەرجەم پارەی گەنمی جووتیاران دەنێردرێت

ئاڤا نیوز

80%ـی پارەی گەنمی جووتیارانی هەرێمی کوردستان، لەلای وەزارەتی دارایی عێراقە، هاوشێوەی چەند پارێزگایەکی دیکە نەنێردراوە.

وێنە گەورەکە: بڕیاربوو ئەمساڵ لەگەڵ ڕادەستکردنی گەنمی جووتیاران پارەکەی وەربگرن، بەڵام مانگێک بەسەر تەواوبوونی پڕۆسەی وەرگرتنی گەنم تێدەپەڕێت، بەغدا تەنیا 74 ملیار و 500 ملیۆن دیناری لە کۆی 590 ملیار دینار ناردووە.

لێدوانی فەرمی: زۆزان کۆچەر، ئەندامی لیژنەی کشتوکاڵ لە پەرلەمانی عێراق بە ئاڤا نیوزی گوت: "لە پاڵ هەرێمی کوردستان، جووتیارانی پارێزگاکانی کەرکووک، سەڵاحەدین، ئەنبار، نەینەوا و دیالەش بەشێکی پارەی گەنمیان ماوە و بەهۆکاری هونەری و ئیداری نەنێردراوە."

زانیاریی زیاتر: وەزارەتی دارایی حکومەتی فیدراڵ بەڵێنیی داوە لە ماوەی 15 ڕۆژی داهاتوو ئەو پارەیەی ماوە خەرجی بکات.
ئەو ئەندامەی لیژنەی کشتوکاڵ لە پەرلەمانی عێراق وای گوت.