وەزارەتی کاری عێراق: لە دوو ساڵی ڕابردوو کارکردنی منداڵان زیادی کردووە

ئاڤا نیوز

 

بەگوێرەی وەزارەتی کار و کاروباری کۆمەڵایەتیی عێراق، ڕێژەی کارکردنی منداڵان لە بەغدا و پارێزگاکانی دیکەی عێراق لە چەند ساڵی ڕابردوودا زیادی کردووە، بۆ سنووردارکردنی ئەو دیاردەیە حکومەت ڕێکاری یاسایی دژی خاوەن کارەکان دەگرێتەبەر.

 

وێنە گەورەکە: بەپێی ڕاپۆرتەکانی ڕێکخراوەکانی مافی مرۆڤ و حکومەتی عێراق، ژمارەی ئەو منداڵانەی کار دەکەن ڕوو لە زیادبوونە کە هەژاری و نەبوونی و خراپی بارودۆخی ئابووری هۆکاری سەرەکی ئەو دیاردەیەن.

 

لێدوانی فەرمی: نەجم ئەلعیقابی، گوتەبێژی وەزارەتی کار و کاروباری کۆمەڵایەتی ڕایگەیاند: لە دوو ساڵی ڕابردوودا ڕێژەی کارکردنی منداڵانی ژێر 18 ساڵی زیادی کردووە کە بەشێکیان لە کارە قورس و سەختەکاندا ئیش دەکەن. 

 

لەلایەکی دیکەوە: نەجم عیقابی جەختی کردەوە کە ئەو خاوەن کارانەی کار بە منداڵانی ژێر 18 ساڵی دەکەن ڕێکاری یاسایی بەرامبەریان دەگرێتەبەر.

 

ئەوەی پێیویستە بیزانیت: سەنتەری عێراق بۆ مافەکانی مرۆڤ پێشتر بە ئاڤا نیوزی ڕاگەیاندبوو، زیاتر لە 700 هەزار منداڵ لە عێراق کار دەکەن.