سەرۆک بارزانی و خەمیس خەنجەر لەبارەی پۆستی سەرۆکی پەرلەمانی عێراق کۆدەبنەوە

ئاڤا نیوز 

هەوڵەکان بۆ یەکلاکردنەوەی پرسی سەرۆکی پەرلەمانی عێراق بەردەوامن و شاندێکی پارتی سیادە بەسەرۆکایەتیی خەمیس خەنجەر لە هەولێر لەگەڵ سەرۆک بارزانی کۆبووەوە.

ڕاگەیێنراوی فەرمی: نووسینگەی خەمیس خەنجەر ڕایگەیاند:  "باسی هاوبەشی نێوان پارتی دیموکراتی کوردستان و پارتی سیادە و دیارترین پێشهاتەکانی گۆڕەپانی سیاسی و قۆناغەکانی ئێستا و داهاتوویان کردووە، دیارترینیان پۆستی سەرۆکی پەرلەمانی عێراق". 

زانیاریی زیاتر: جەخت لە پێویستیی ڕێککەوتنی هەموو هێزەکان کراوەتەوە بۆ گەیشتن بە چارەسەرێک کە جێگەی ڕەزامەندی هەموو لایەنەکان بێت، پۆستی سەرۆکی پەرلەمان بە کەسایەتییەکی لێهاتوو  پڕبکرێتەوە کە خواستەکانی خەڵک بەدیبهێنێت و کۆتایی بەو بابەتە بهێنرێت. 

قووڵتر: بەپێی ڕاگەیێنراوەکەی سیادە، هەردوولا هاوڕابوون لەسەر گرنگی پابەندبوون بەو ڕێککەوتنە سیاسییەی کە حکومەتی لەسەر پێکهێنراوە، کە جێبەجێکردنی بڕگەکانی بەشێوەیەکی شەفاف دڵنیایی ئەوە بە لایەنەکان دەدات لە پێشێلنەکردنی ڕێککەوتنەکان و خزمەتکردنی هاووڵاتیان کە ئەمەش لەپێش هەموو شتێکەوەیە.

لەلایەکی دیکەوە: بارەگای بارزانی بڵاویکردەوە، لە دیدارەکەدا بیروڕا لەبارەی  بارودۆخی گشتیی و دوا پەرەسەندن و هاوکێشەکانی ناو پرۆسەی سیاسیی عێراق و بارودۆخی پارێزگای کەرکووک ئاڵوگۆڕ کراوە.

 

وێنە گەورەکە: زیاتر لە نۆ مانگە محەممەد حەلبووسی بە بڕیارێکی دادگەی فیدراڵی لە پۆستی سەرۆکی پەرلەمان دوور خراوەتەوە. لەو کاتەشەوە سوننەکان بەهۆی ناکۆکییان نەیانتوانیوە کەسێک وەک  جێگرەوەی هەڵبژێرن.