"بەم نزیکانە تەواوی پارەی گەنمی جووتیارانی هەرێمی کوردستان دەنێردرێت"

ئاڤا نیوز

زیاتر لە 500 ملیار دینار پارەی گەنمی جووتیارانی هەرێمی کوردستانی لای بەغدا لاماوە، وەزیری بازرگانی هەرێمی كوردستان دەڵێت " بڕیارە بەم نزیکانە کۆی پارەکە رەوانە بکرێت".

لێدوانیی فەرمی:کەمال موسلیم، وەزیری بازرگانی و پیشەسازیی هەرێمی کوردستان بە ئاڤا نیوزی گوت: دەربارەی ئەو گوژمە پارەیەی جووتیاران کە لای بەغدا ماوە، قسەم لەگەڵ وەزارەتی بازرگانی عێراق کردووە و پێیان ڕاگەیاندم، بەم نزیکانە پارەكە دەنێرن.

ئەوەی پێویستە بیزانیت: تا ئێستا 74 ملیار و 500 ملیۆن دینار بۆ پارەی گەنمی جوتیارانی هەرێمی کوردستان گەیشتووە و  نزیکەی 500 ملیاری دیکە ماوە.

زانیاریی زیاتر: نەناردنی پارەی گەنمی جووتیارانی هەرێمی کوردستان تا ئێستا پەیوەندی بەوەوە هەیە، حكومەتی عێراق ئەو بڕە گەنمەی بۆ وەرگرتن لە جووتیاران دیاری کردبوو، ڕێژەی وەرگرتنەکەی زیاتر کردووە. کەمال موسلیم وا دەڵێت.