جەلال پەرێشان لە هەڵبژاردن دەکشێتەوە

ئاڤا نیوز

 

جەلال پەرێشان، بەربژێری سەربەخۆ، لە هەڵبژاردنی خولی شەشەمی پەرلەمانی کوردستان کشانەوەی خۆی ڕاگەیاند.

 

کۆنگرەی ڕۆژنامەوانی:  جەلال عەبدوڵڵا ناسراو بە جەلال پەرێشان کە خۆی لە بازنەی هەولێر بۆ هەڵبژاردنی پەرلەمانی کوردستان بەربژێر کردووە، ئێوارەی ئەمڕۆ ڕایگەیاند کشانەوەی خۆی لە بەربژێری پێشکەش بە کۆمیسیۆن کردووە و دەکشێتەوە.

 

هۆکارە زانراوەکان: جەلال پەرێشان ڕایگەیاند: "من وەک بەربژێرێکی لەسەرخۆ نەک سەربەخۆ لە کەشوهەوایەکی ئازاد و بە باوەڕەوە دەستلەکارکێشانەوەی خۆم ڕادەگەیێنم، دەمەوێ هەر لە ناو خەڵکدا بم و نامەوێ لێیان دوورکەومەوە، ڕەنگە لە شوێنێکی دیکە بتوانم خزمەتی زیاتری خەڵک بکەم، چونکە لەگەڵ خوا و  خۆم و خەڵک ڕاستگۆم و هەرواش دەمێنمەوە، خۆشم بە دەروێشی پارتی دەزانم".

 

زانیاریی زیاتر: جەلال پەرێشان، ئەندامی خولی پێنجەمی پەرلەمانی کوردستان بوو لەسەر فراکسیۆنی پارتی، پێشتریش ئەندامی ئەنجوومەنی پارێزگای هەولێر بوو.

ئەمەش بزانە: بۆ ئەم هەڵبژاردنە 13 لیست و دوو هاوپەیمانێتی و 124 بەربژێری سەربەخۆ  خۆیان تۆمارکردبوو، تاوەکو ئێستاش ژمارەیەک بەربژێری سەربۆ کشاونەتەوە.