یەکێتی: بێ پارتی کۆبوونەوەی ئەنجوومەنی پارێزگای کەرکووک ناکەین

ئاڤا نیوز

لایەنە پێکهێنەرەکانی حکومەتی خۆجێیی کەرکووک نامەی فەرمییان بۆ لایەنە بەشدارنەبووەکان ناردووە و داوایان لێکردوون لە کۆبوونەوەی داهاتووی ئەنجوومەنی پارێزگا بەشدار بن، ئەندامێکی یەکێتیش دەڵێت ئەوەندەی بتوانن بێ ئەوان کۆبوونەوە ناکەن.

وێنە گەورەکە: ڕۆژی 24-8-2024 ئەنجوومەنی پارێزگای کەرکووک  بە بەشداری نۆ ئەندام (پێنج یەکێتی، سێ عەرەب و ئەندامێکی بزووتنەوەی بابیلوون) لەکۆی 16 ئەندام یەکەم کۆبوونەوەی کرد. دوو ئەندامی پارتی و دوو ئەندامی بەرەی تورکمانی و سێ ئەندامی عەرەب کە لە دەرەوەی ڕێککەوتنی پێکهێنانی حکومەتی خۆجێیین، بەشداریی کۆبوونەوەکەیان نەکرد، ژمارەیەک پۆستی پارێزگاکەش بۆ ئەو لایەنانە دانراون و داوایان لێدەکەن وەریان بگرن.

لێدوانی فەرمی: هۆشیار هیجران؛ ئەندامی فراکسیۆنی یەکێتی لە ئەنجوومەنی پارێزگای کەرکووک بە ئاڤا نیوزی گوت، "چاوەڕێی وەڵامی پارتی و لایەنەکانی دیکە دەکەین بۆ ئەوەی بانگهێشتنامە بۆ بەڕێوەچوونی کۆبوونەوەی داهاتوو دەربکرێت."

هۆشیار هیجران جەخت دەکاتەوە وەکو یەکێتی بڕیارە بەبێ پارتی و لایەنەکانی دیکە کۆبوونەوە نەکەن، "بەڵام ئەگەر پێداگربن لەسەر بەشدارینەکردن، ئەوا ناچارن بێ ئەوان کۆبوونەوە بکەن."

لەلایەکی دیکەوە: بڕیارە لە دوو ڕۆژی داهاتوودا فراکسیۆنی یەکێتی سەردانی فراکسیۆنەکانی پارتی، بەرەی تورکمانی و سێ ئەندامەکەی عەرەب بکات کە تاوەکو ئێستا لە دەرەوەی حکومەتی خۆجێیین.