جێگرە کوردەکەی سەرۆککۆماری ئێران سەردانی هەرێمی کوردستان دەکات

ئاڤا نیوز  

پارێزگاری سلێمانی قسەی لەگەڵ جێگری سەرۆککۆماری نوێی ئێران کردووە، دەڵێت "بەڵێنیداوە سەردانی هەرێمی کوردستان و سلێمانی بکات".

وێنە گەورەکە: یەکەمجارە لە ئێران کوردێکی سووننە پۆستێکی باڵا وەردەگرێت، ئەمەش دوای ئەو ڕەخنانەی لە مەسعود پزیشکیان، سەرۆککۆماری ئێران گیرا كە لە کابینەکەی کورد و سووننەکانی بێبەش کردووە.

لێدوانی فەرمی: د.هەڤاڵ ئەبوبەکر، پارێزگاری سلێمانی بە ئاڤا نیوزی ڕاگەیاند: بۆ پیرۆزبایی لەگەڵ عەبدلکەریم حسێنزادە، جێگری نوێی سەرۆککۆماری ئێران بە تەلەفون قسەمکردووە، ئەو بەڵێنیداوە سەردانی هەرێمی کوردستان و پارێزگای سلێمانی بکات.

زانیاريی زیاتر: لەبارەی دیاریکردنی وادەیەک بۆ هاتنی عەبدلکەریم حسێنزادە، پارێزگاری سلێمانی دەڵێت: هیچ کاتێک دیارینەکراوە، لەبەرئەوەی ئێستا بۆ میوانداری ئامادەییمان نییە.

باکگراوند: عەبدلکەریم حسێنزادە، نوێنەری هەڵبژێردراوی شاری نەغەدە و شنۆی ڕۆژهەڵاتی کوردستان بوو بۆ پەرلەمانی ئێران، ڕۆژی 26-8-2024 کرا بە جێگری سەرۆککۆماری ئێران بۆ  "کاروباری گەشەپێدانی گوند و ناوچە بێبەشکراوەکانی وڵات".