بۆ یەکەم جار لە ناوچەیەکی هەرێمی کوردستان زەوی دابەش دەکرێت

ئاڤا نیوز

لە ئیدارەی سەربەخۆی سۆران پرۆسەی دابەشکردنی زەوی دەست پێ دەکات، لەم هەفتەیە سەرووی 500 فەرمانبەر تیروپشکی دابەشکردنی زەوییان بۆ دەکرێت بڕیارە بە چەند قۆناغێک پرۆسەکە بەردەوام بێت.

وێنە گەورەکە: نزیکەی 40 هەزار فەرمانبەر و خانەنشین لە سنووری ئیدارەی سەربەخۆی سۆران لە وەرگرتنی زەوی سوودمەند دەبن، بەهۆی هەڵکەوتەی جوگرافی سنوورەکە زەوی پێویست لەبەردەست نییە، بۆیە پرۆسەکە دواکەوت، ئێستا سنووری شارەوانی قەزاکان فراوان دەکرێت بۆ ئەوەی زەوی بۆ سەرجەمیان دابین بکرێت.

لێدوانی فەرمی: خەسرۆ ئیسماعیل، بەڕێوەبەری گشتیی شارەوانییەکانی ئیدارەی سەربەخۆی سۆران بە ئاڤای گوت، "لە سنووری قەزای ڕواندز سێ هەزار و 335 کەس لە پرۆسەی وەرگرتنی زەوی سوودمەند دەبن، لەم هەفتەیە تیروپشک بۆ دابەشکردنی 580 پارچە زەوی دەکەین، چەند نەخشەیەکی کەرتی دیکەش ئامادەکراون لە قۆناغەکانی داهاتوو کاری لەسەر دەکەین و بەسەر فەرمانبەر و خانەنشیناندا دابەش دەکرێت".

زانیاریی زیاتر: ئیدارەی سەربەخۆی سۆران لە شەش قەزا و 13 ناحیە پێکهاتووە، هەشت هەزار و 500 پارچە زەوی لەو سنوورانە ئامادەکراون و بەڕێوەبەرایەتی گشتیی شارەوانییەکان کار لەسەر ئەوە دەکات، زەوی بۆ سەرجەم ئەو فەرمانبەران و خانەنشینانە دابین بکات، کە مەرجەکان دەیانگرێتەوە و سوودمەند دەبن.