مالیكی هەوڵی دوورخستنەوەی وەزیری نەوتی عێراق دەدات

ئاڤا نیوز

دەوڵەتی یاسا لە کارەکانی وەزیری نەوت نیگەرانە و دەیەوێت لەڕێگەی کۆکردنەوەی واژۆی پەرلەمانتارانی چوارچێوەی هەماهەنگی، متمانە لە وەزیری نەوت وەربگیرێتەوە.

وێنە گەورەکە: دەوڵەتی یاسا لە چوارچێوەی هاوپەیمانییەک بەناوی "چوارچێوەی هەماهەنگی" بەشدارە لە پێکهێنانی حکومەت، نوری مالیکی سەرکردایەتی دەوڵەتی یاسا دەکات.

زانیاریی بەدەستهاتوو: سەرچاوەیەکی ئاگادار بە ئاڤا نیوزی گوت: وەزارەتی نەوت پشکی دەوڵەتی یاسایە، نوری مالیکی، سەرۆکی دەوڵەتی یاسا بڕیاریداوە حەیان عەبدولغەنی، وەزیری نەوت دووربخاتەوە و کەسێکی دیکە بخاتە شوێنی، ئێستا هەنگاوەکانی دەستپێکردووەو پەرلەمانتارانی چوارچێوەی هەماهەنگی واژۆیان بۆ لادانی کۆکردوەتەوە.

لە لایەکی دیکەوە: وەزارەتی نەوت لەڕاگەیێنراوێکدا دەنگۆی هەبوونی هەوڵ بۆ دوورخستنەوەی حەیان عەبدولغەنی ڕەتکردووەتەوە و دەڵێت "ئەم هەواڵە هیچ بنەمایەکی نییە و وەزیر لەسەر کارەکانی بەردەوامە".

هۆکارە زانراوەکان: ئەو سەرچاوەیەی قسەی بۆ ئاڤا نیوز کردووە دەڵێت:" هۆکاری سەرەکی لادانی وەزیری نەوت بۆ ئاشکرا بوونی پەیوەندی نێوان حەیان عەبدولغەنی و قەیس خەزعەلی، ئەمینداری گشتی بزوتنەوەی عەسائیب ئەهلولحەق دەگەڕێتەوە".

ئەوەی پێویستە بیزانیت: دوو کەس بۆ شوێنگرەوەی حەیان عەبدولغەنی دەستنیشان کراون، یەکەمیان، نەسیر عەزیز جەبار، بەرپرسی دیراساتی وەزارەتی نەوتی عێراقە و ئەوی دیکەشیان باسم عەبدولکەریم ناسر، بەڕێوەبەری گشتی کۆمپانیای نەوتی باشوورە.

 

قووڵتر: بەپێی ڕاپۆرتێكی ڕۆژنامەی شەرقولئەوسەت، ناكۆكی نێوان مالیكی و خەزعەلی دەگەرێتەوە بۆ ساڵی 2023 و لەبەر چەند گرێبەستێكی نەوتی بووە و خەزعەلی پرۆژەیەكی نەوتیی داوەتە حكومەتی عێراق بەبێ ئەوەی بگەڕێتەوە بۆ لایەنە پەیوەندیدارەكان، ئەوەش وایكردووە مالیكی نیگەران بێت.

باکگراوند: حەیان عەبدولغەنی، لە ساڵی 2022-ەوە وەزیری نەوتی عێراقە، پێشتر بەڕێوەبەری بەشی دیزاین بووە لە کۆمپانیای نەوتی باشوور و یاریدەدەری بەڕێوەبەری کۆمپانیاکە بووە، دواتریش بووە بە بەڕێوەبەری گشتی کۆمپانیای نەوتی باشوور، سەرۆکی دەستەی بەڕێوەبەرایەتی کۆمپانیای غازی بەسرەش بووە.