ئەنجامی کۆتایی هەڵبژاردنی پەرلەمانی عێراق ڕادەگەیێنرێت

ئاڤا نیوز

ڕۆژی دووشەممە، کۆمیسیۆنی باڵای سەربەخۆی هەڵبژاردنەکانی عێراق ئەنجامی کۆتایی هەڵبژاردنی خولی شەشەمی پەرلەمانی عێراق ڕادەگەیەنێت.

چیرۆکی سەرەکی: ڕۆژی دووشەممە، 17-11-2025، کۆمیسیۆنی باڵای سەربەخۆی هەڵبژاردنەکانی عێراق ئەنجامی کۆتایی هەڵبژاردنی خوولی شەشەمی پەرلەمانی عێراق ڕادەگەیەنێت و ناوی سەرجەم لیست و کاندیدە براوەکان بڵاودەکاتەوە.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤای ڕاگەیاند: دوای نیوەڕۆی ڕۆژی دووشەممە، کۆمیسیۆنی باڵای سەربەخۆی هەڵبژاردنەکانی عێراق ئەنجامی کۆتایی هەردوو دەنگدانی گشتی و تایبەتیی هەڵبژاردنی خولی شەشەمی پەرلەمانی عێراق ڕادەگەیەنێت.

زانیاریی زیاتر: لە پرۆسەی هەڵبژاردنی خولی شەشەمی پەرلەمانی عێراق 102 سکاڵا تۆمارکراون، 43 سکاڵا لە دەنگدانی تایبەت و 59 سکاڵا لە دەنگدانی گشتی، بەڵام بەو پێیەی سکاڵاکان ڕەنگی سووری تێدانییە و ڕەنگی سەوز و زەردبوون، بۆیە هیچ کاریگەریەکیان لەسەر ئەنجامی کۆتایی هەڵبژاردن نابێت.

ئەمەش بزانە: بەپێی یاسای هەڵبژاردنەکان دوای ڕاگەیاندنی ئەنجامی کۆتایی هەڵبژاردن، کۆمیسیۆنی باڵای سەربەخۆی هەڵبژاردن سێ ڕۆژ دەداتە کاندید و لایەنە سیاسییەکان بۆ ئەوەی ئەگەر تانەیان هەبێت پێشکەشی بکەن، کۆمیسیۆنیش لە ماوەی یەک هەفتە تانەکان یەکلایی دەکاتەوە.

باکگراوند: ڕۆژی 12-11-2025 کۆمیسۆنی هەڵبژاردنەکان ئەنجامی بەرایی ڕێژەی 99.74%ـی دەنگی جیاکراوەی ڕاگەیاند.