پارتی بەشداریکردنی لە حکومەتی خۆجێیی کەرکووک یەکلایی دەکاتەوە

ئاڤا نیوز

پارتی دیموکراتی کوردستان لە کەرکووک  کۆبوونەوەیەک دەکات و پرسی بەشداریکردن لە حکومەتی خۆجێیی کەرکووک یەکلایی دەکاتەوە.

وێنە گەورەکە: یەکێتی و لایەنە بەشداربووەکانی نێو ڕێککەوتنی پێکهێنانی حکومەتی خۆجێیی  کەرکووک چاوەڕێی وەڵامی پارتی و بەرەی تورکمانی و سێ ئەندامی هاوپەیمانیی عەرەبی دەکەن بۆ کۆبوونەوە و گفتوگۆکردن لەبارەی وەرگرتنی پۆست و بەشداریکردنیان لە حکومەتی پارێزگاکە.

لێدوانی فەرمی: شۆخان حەسیب، ئەندامی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی گوت، "پێش کۆبوونەوە لەگەڵ ئەوان پێویستمان بە کۆبوونەوەیەکی نێوخۆییە، ئەم هەفتەیە کۆبوونەوەیەکی بەرفراوان لەسەر ئاستی مەکتەبی ڕێکخستنی کەرکووک ڕێکدەخرێت، تێیدا پرسی بەشداریکردن لە حکومەتی خۆجێیی کەرکووک یەکلایی دەکرێتەوە."

باکگراوند: لە یەکەم کۆبوونەوەی ئەنجوومەنی پارێزگای کەرکووک کە ڕۆژی 24-08-2024 بە بەشداریی (پێنج ئەندامی یەکێتی، سێ ئەندامی عەرەب و یەک کۆتای کریستیان) بەڕێوەچوو، بڕیاردرا پەیامێکی پێشوەختە بۆ لایەنە بەشدارنەبووەکان بنێرن کە خاوەنی حەوت کورسین بەمەبەستی کۆبوونەوە و گفتوگۆکردنیان لەبارەی بەشداریکردنیان لە حکومەتی خۆجێیی.