بەریتانیا بۆ كەمكردنەوەی زیانە ژینگەییەكان سوود لە توێژینەوەی كوردێک وەردەگرێت

ئاڤا نیوز

بۆ كەمكردنەوەی زیانە ژینگەییەكان و کەمکردنەوەی ماددە ژەهراوییەكانی ناو ژینگە، حكومەتی بەریتانیا سوود لە توێژینەوەی كوردێک وەردەگرێت.

وێنە گەورەكە: لە چوارچێوەی پلانی "نێت زیرۆ" حكومەتی بەریتانیا پلانی هەیە ڕێژەی دەردانی گازە زیانبەخشەكانی وەك دوانە ئۆكسیدی كاربۆن و میسان لە پڕۆژە گەورەكاندا نزیك بكاتەوە لە سفر، بۆ ئەمەش پشت بە چەندین توێژینەوەی زانستی دەبەستێت. گازەکانی میسان و دوانە ئۆکسیدی کاربۆن گازی زیانبەخشن و ئەگەر ڕێژەیان لە هەوا زۆر بێت مەترسیدارن.

 

ئەوەی پێویستە بیزانیت: د.ماردین عومەر عەبدولقادر، خاوەنی بڕوانامەی دكتۆرایە لە بواری وزە و ژینگە لە بەریتانیا، توێژینەوەیەكی لەبارەی پاشماوەی باڵەخانەكان و زبڵی بیناكان كردووە، تێیدا بەو ئەنجامە گەیشتووە دەتوانرێ ماددەیەك بۆ  كەمكردنەوەی گازە زیانبەخشەكان لە ناو سروشتدا بەکاربهێنرێت، ئەمەش گرنگییەكی گەورەی بۆ پاراستنی ژینگە هەیە.

ئەمەش بزانە: حكومەتی بەریتانیا توێژینەوەكەی د. ماردین و چەندین كەسی دیكەی كردووەتە پڕۆژەیەك و پێشكەشی پەرلەمانی كردووە، پەرلەمانیش پابەندی خۆی بە پڕۆژەكە دەربڕیوە بۆ ئەوەی كاری لەسەر بكرێت و جێبەجێ بكرێت.

لێدوانی فەرمی: دكتۆر ماردین عومەر عەبدولقادر، لە گفتوگۆیەكدا لەگەڵ ئاڤا نیوز، باسی لە پڕۆژەكەی كرد و گوتی، شانازی دەكات وەك كوردێك بەشدارە لە پاراستنی ژینگە و بەردەوام دەبێت لە پەرەپێدان بە كارەكانی و پڕۆژەكانی لە بواری وزە و ژینگەدا.

ئەمەش بزانە: توێژینەوەكە لە گۆڤاری زانستی "Journal of Cleaner Production " بڵاوكراوەتەوە و  یەكێكە لە توێژینەوە گرنگەكانی بواری ژینگە.